Sonte mësohen dhe ekipet çerekfinaliste të Ligës së Europës, vetëm një natë pasi diçka e tillë ngjau në Champions League.
Pas tetë ndeshjeve të para, të zhvilluara javën e kaluar, sonte luhen sfidat e dyta, vendimtare për fatin e gjashtëmbëdhjetë skuadrave.
Veç një ndeshjeje, atë mes dy skuadrave të kampionatit belg, Genkut dhe Gentit, që ka për fitues në takimin e parë, me një rezultat të thellë, 2-5, Genkun, e ku përfundimi ngjan të jetë i ditur, të gjitha përballjet e tjera janë të hapura, me kualifikimin që mund t’i buzëqeshë çdo skuadre.
Roma – Lion është më i spikatur takim, nëse do të duhet të veçonim ndonjërin prej tyre. Nuk duhet lënë mënjanë përplasja mes Beshiktashit dhe Olimpiakosit.
Ndeshjet do të luhen në dy orare, për të nisur fillimisht në 19:00. Krasnodar – Selta Vigo, Genk – Gent dhe Beshiktash – Olimpiakos do ta kenë bilbilin e parë pikërisht në këtë orë.
Në 21:05 vijnë sfidat, Ajaks – Kopenhagen, Anderleht – APOEL, Roma – Lion, Borusia e Mynshegladbahut – Shalke 04 dhe Mançester Junajted – Rostov. /tesheshi.com/
