Turqit e Fenerbahçes ishin të vetmit në dy grupet e 16 skuadrave më të mira në Euroligë që nuk e njihnin ende humbjen gjer mbrëmjen e së enjtes. Ata i janë dorëzuar Panathinaikosit në Athinë, në një ndeshje që nuk u shkoi mirë.
Obradoviç, trajneri aktual i Fenerbahçes, u kthye aty ku kishte qëndruar për mbi një dekadë si drejtues i Panathinaikosit, duke e bërë atë një prej ekipeve më të mira të Europës në basketbollin për meshkuj. Në krye të Fenerbahçes, ai synon të përsëri të njëjtën gjë, dhe sinjalet janë dhënë për këtë.
Grekët e Panathinaikosit nuk patën një nisje të mirë të fazës në grupe me 16 skuadrat më të mira të kontinentit, por dalëngadalë e rritën nivelin e paraqitjes së tyre, e fitorja e mbrëmshme ishte e katërta rresht.
Sa i përket ndeshjes, ndryshe dhe takimi i javës në Euroligë, Fenerbahçe arriti ta mbyllë në epërsi vetëm
dhjetëminutëshin e parë, të fituar 15-20. Në tre çerekët e tjera të lojës qenë grekët ata që patën avantazhin, duke i fituar kësisoj, 21-16, 19-17 dhe 21-18.
I tërë takimi u mbyll 76-71 për vendasit. Shënuesi më i mirë te Panathinaikosi ishte Elliot Williams, me 14 pikë, ndërsa te Fenerbahçe qe Ekpe Udoh, me 19 të tilla.
Fenerbahçe mban vendin e parë në grupin E, me shtatë fitore e një humbje, kurse Panathinaikosi gjendet në vend të tretë. /tesheshi.com/
