Pas një serie të gjatë ndeshjesh në grupe, në aktivitetin më të rëndësishëm në basketbollin e meshkujve për klube në Europë u ka ardhur radha takimeve eliminatore, të playoff-it.
Seritë prej pesë ndeshjesh, që vënë përballë tetë ekipet më të mira të basketbollit europian, janë të fundit para Final Four-it, që do të zhvillohet muajin e ardhshëm në Berlin. Ndërsa në katër sezonet e shkuara 15 prej 16 ekipeve që e fituan takimin e parë në playoff ia dolën më pas të arrijnë në finalen e katër skuadrave më të mira, të tëra formacionet duan t’i nisin me një fitore eliminatoret.
Kanë bërë kështu Fenerbahçe dhe CSKA e Moskës, që i kanë fituar takimet e tyre të para.
Kryesuesja e grupit E, skuadra turke e Fenerbahçes, që synon ta fitojë dhe trofeun e aktivitetit këtë vit, ka mposhtur mbrëmë Realin e Madridit.
Fenerbahçe ka fituar 75-69 në “Ülker Arena”. Turqit kanë udhëhequr thuajse gjithë ndeshjes, përjashtuar një moment të lojës, kur skuadra e Madridit kryesoi 51-52 në dhjetëminutëshin e tretë. Bogdan Bogdanoviç dhe Kostas Slukas ishin shënuesit më të mirë për vendasit, me nga 17 pikë.
Në “Megasport Arena”, CSKA e Moskës i ka mposhtur 84-74 serbët e Crvena Zvezdës. Kjo ishte e 15-ta fitore rresht e rusëve në playoff në ndeshjet në fushën e tyre. Skuadra mike e mbylli në epërsi vetëm dhjetëminutëshin e dytë, 19-20, për t’i humbur tre fraksionet e tjera të lojës, 25-20, 19-16 dhe 21-18. Te moskovitët spikati Teodosiç, që ishte dhe shënuesi më i mirë, me 23 pikë.
Sonte luhen dy takimet e tjera të para të playoff-it, Laboral – Panathinaikos dhe Lokomotiv Kuban – Barcelona.
Ndeshjet e dyta do të luhen të enjten dhe të premten, më 14 dhe 15 prill. /tesheshi.com/
