CSKA-ja e Moskës është ekipi i parë që ka prerë biletën për Final Four-in, që do të zhvillohet muajin e ardhshëm në Berlin.
Rusët e fituan dhe ndeshjen e tretë në Beograd ndaj Crvena Zvezdës pasi i kishin fituar dy takimet e para në Moskë.
Seria 3-0 e fitoreve të CSKA-së u plotësua me triumfin e mbrëmshëm 71-78 në “Kombank Arena” të kryeqytetit të Serbisë.
Me këtë sukses, CSKA-ja siguron pjesëmarrjen në finale për të pestin vit radhazi, e për të 13-tën herë në 14 vitet e fundit.
Fenerbahçe dhe Laborali kanë mundësi sonte po ashtu të presin biletën për në finalet e katër skuadrave më të mira të kontinentit.
Turqit e Fenerbahçes do të luajnë në Madrid ndaj kampionëve në fuqi të Euroleague-s, ndaj Realit. Paraqitjet jo të mira të madrilenëve në këtë sezon, por edhe kurba në ngjitje e lojës së Fenerbahçes, kanë bërë që ekipi turk t’i fitojë dy takimet e para të playoff-it në Stamboll.
Nëse Fenerbahçe fiton sonte, siguron pjesëmarrjen në finale, ndryshe do t’i duhet të luajë sërish.
E njëjta panoramë është për Laboralin, që kryeson 2-0 ndaj Panathinaikosit. Por sonte luan në Athinë, ku është shumë e vështirë të fitosh ndaj skuadrave greke. Fitorja do ta kualifikonte dhe Laboralin për në Final Four.
Çifti më i ekuilibruar është Lokomotiv Kuban – Barcelona. Ndërsa sonte pritëse është skuadra spanjolle, mes dy formacioneve ka barazpeshë të plotë, pasi rezultati i playoff-it është 1-1.
Ky është i vetmi ballafaqim për të cilin është e sigurt se do të vijojë dhe pas kësaj mbrëmjeje. /tesheshi.com/
