Java e 24-t e sezonit të rregullt të Euroleague-s solli dy rezultate të kundërta për dy ekipet me renditjen më të mirë.
Reali i Madridit humbi të enjten në mbrëmje në Stamboll ndaj Gallatasarajit. Kjo ishte humbja e parë për të pas një serie prej nëntë fitoresh radhazi.
Rezultati përfundimtar qe 87-84 për skuadrën turke; Reali mbetet gjithsesi në krye në klasifikim.
Paraqitje krejt e ndryshme e CSKA-së së Moskës në Spanjë, ku mbrëmë fitoi thellë, 61-85, ndaj Barcelonës pritëse.
Me 18 fitore e 6 humbje, rusët pasojnë Realin në renditje, me shifra thuajse të ngjashme.
Mesjava ka qenë pozitive për të tëra skuadrat turke. Veç Gallatasarajit, fitore arritën dhe tre ekipet e tjera të Stambollit. Fenerbahçe fitoi 67-76 në fushën e Zhalgiris Kaunasit, Anadollu Efes triumfoi 92-99 në transfertën e Uniks Kazanit, dhe Darushafaka mposhti 77-72 grekët e Panathinaikosit.
Olimpiakosi u kthye me një fitore të çmuar nga Izraeli, ku fitoi 71-82 ndaj Makabit të Tel-Avivit. Në dy takimet e tjera, Crvena Zvezda fitoi 74-60 me Brose Bamberg, e ngjashëm Baskonia Vitoria Gasteiz mposhti EA7 Emporio Armani Milan, 87-74.
Pas Realit të Madridit dhe CSKA-së së Moskës, në kryesim vijnë Olimpiakosi dhe Fenerbahçe. /tesheshi.com/
