Nga Mensur Krasniqi
Pas dilemave dhe debateve të shumta rreth asaj se do të mbahen ose jo zgjedhjet e parakohshme parlamentare në Maqedoni më 24 prill, ashtu siç është e paraparë sipas Marrëveshjes së Përzhinos, këto ethe i ka shuar Komisioneri për Zgjerim dhe Fqinjësi, Johannes Han.
Ai ka njoftuar vizitën e tij nesër në Shkup, një takim me liderët e të katër partive politike, për të inspektuar përmbushjen e marrëveshjes së qershor/korrikut, e quajtur marrëveshja e Përzhinos. Sipas komunikatës për shtyp nga zyra e tij, e dhënë para vizitës së nesërme, Han duket se nuk lëshon pe nga data e zgjedhjeve.
“Pres që elemente të rëndësishme të marrëveshjes politike do të zgjidhjen përpara ose gjatë vizitës sime, duke i lejuar KSHZ-së organizim të zgjedhjeve të besueshme, sipas datës së parashikuar dhe të rënë dakord”, tha Han.
Kjo nënkupton që Hahn aludon direkisht në dorëheqjen e Kryeministrit Gruevski të jetë konform marrëveshjes së arritur. Dhe sipas Marrëveshjes Gruevski pritet të jep dorëheqje sot, eventualisht nesër.
Mirëpo partia maqedonase në opozitë e udhëhequr nga Zoran Zaev mendon se data 24 prill është një datë e cila është shumë e papërshtatshme për mbajtjen e zgjedhjeve, për shkak se KSHZ ende nuk e ka pastruar listën zgjedhore dhe nuk i ka plotësuar kushtet që të organizoj zgjedhje të lira dhe demokratike. Kështu nuk mendojnë nga Këshilli Shtetëror Zgjedhor. Një zyrtar i lartë i KSHZ-së, për gazetën maqedonase “DNEVNIK”, ka vlerësuar se KSHZ-ja, ka kapacitet të plotë që të organizojë zgjedhje të lira në Maqedoni.
Zyrtari i VMRO-së, anëtar në KSHZ, Vllatko Stajkovski mendon se lojërat politike e bllokojnë KSHZ-në, ndryshe sipas tij komisioni ka kapacitet të plotë që zgjedhjet në Maqedoni të realizohen me datën 24 prill.
“Që nga viti 1998 e deri më sot, deri sa unë të marrë pjesë në organizimin e zgjedhjeve si zyrtarë në KSHZ, mund tju them me përgjegjësin më të madhe se zgjedhjet e deritanishme kanë qenë ferr dhe demokratike, andaj edhe u pranuan nga faktori ndërkombëtar, andaj mendoj se ka kapacitet KSHZ që ti organizon. Përbërja e KSHZ-së, është e plotësuar edhe me ekspert, andaj realisht nuk ka bazë që ti bëhet presion komisionit për tu organizuar zgjedhje kredibile”, ka deklaruar Stajkovski.
Ndryshe, diplomatët perëndimorë dhe ata amerikanë me këmbëngulsi kërkojnë që zgjedhjet në Maqedoni të jenë fer dhe demokratike, të pastrohet lista zgjedhore dhe asnjë parti të mos manipulojë me votuesit fiktiv, madje edhe me votues të vdekur. /tesheshi.com/
