Nga Mensur Krasniqi
Pas një maratonë takimesh ndërmjet eurokomisarit Johanes Han dhe liderëve partiakë, situata politike në Maqedoni vazhdon të mbetet e padefinuar. Shpresat që pas këtij takimi do të arrihet marrëveshje për mbajtjen e zgjedhjeve të parakohëshme parlamentare konform Marrëveshjes së Përzhinos, dalëngadalë po shuhen.
Në dalje nga rezidenca e BE-së në Përzhino, numri 1 i LSDM-së, Zoran Zaev në një prononcim të shkurtër për gazetarët tha: “Për ne zgjedhjet janë të papranueshme. Pa u rregulluar në kohë çështja e mediave dhe pastrimi i listës zgjedhore, ne nuk marrim pjesë në zgjedhje.”
Pas përfundimit të takimit para mediave, është prononcuar edhe eurokomisari Johanes Han. Ai ka shprehur dëshprimin e tij pas rrjedhës së bisedimeve me krerët e partive nënshkruese të marrëveshjes, të cilat nuk kanë treguar vullnet për zgjidhje.
“Shteti në këto momente është në gjendje të rëndë”, ka deklaruar Han.
Ai paralajmëroi se do të vijë edhe njëherë në Maqedoni dhe tha se e vetmja gjë të cilën mund ta garantojë është se institucionet evropiane janë këtu.
Por Hahn nuk e hodhi poshtë mundësin për mbajtjen e zgjedhjeve.
“Tani gjithçka varet nga partitë, ky është vendim i shtetit dhe i parlamentit”.
Ndërsa lideri i VMRO-së, Nikolla Gruevski ka deklaruar që nuk ekziston asnjë pengesë për mbajtjen e zgjedhjeve, përveçse Zoran Zaevit që nuk dëshiron, dhe me këtë sipas tij, Zaev vetëm po e thellëson krizën politike në vend.
“Eurokomisari Han në takim më ka thënë se as Këshilli Shtetëror Zgjedhor, as OSBE dhe as ODIHRI nuk kanë paraparë asnjë pengesë për t’u mbajtur zgjedhjet më 24 prill. I vetmi njeri që është kundër zgjedhjeve në këtë datë, është lideri i LSDM-së, Zoran Zaev i cili me këtë vetëm po e thellon krizën politike”, deklaroi Nikolla Gruevski.
Nga blloku politik shqiptar, kryetari i BDI-së Ali Ahmeti është shprehur i shqetësuar meqë palët gjatë takimit kanë pasur dallime në qëndrimet e tyre dhe fatkeqësisht nuk kanë arritur marrëveshje mbi datën e zgjedhjeve.
“Sigurisht që të gjitha palët kemi patur dallime, nuk arritem për fat të keq të pajtohemi me të arriturën e 2 qershorit (Marrëveshjen e Përzhinos) mbi datën e zgjedhjeve të parapara me 24 prill të këtij vitit”, deklaroi Ahmeti pas takimit të përbashkët.
Ndërkaq, lideri i Partisë Demokratike Shqiptare, Menduh Thaçi nuk është paraqitur para mediave për të dhënë qëndrimin dhe vlerësimin e tij nga ky takim. /tesheshi.com/
