Nga Mensur Krasniqi
Në mëngjesin e premtes, eurokomisari Johannes Han arriti në Shkup. Kjo vizitë e tij që ishte paralajmëruar me kohë, u bë pikërisht në ditën që Gruevksi dha dorëheqje nga posti i kryeministrit.
Në agjendën e takimeve që ai realizoi, çuditërisht kësaj rradhe të parin e takoi liderin e partisë opozitare të LSDM-së, Zoran Zaev.
Para se të fillojë takimi, Han nuk ka dhënë deklaratë për media, vetëm shkurt ka thënë që shpreson që dita e sotme të jetë e mirë.
“Momentalisht nuk kam çfarë të deklaroj, mund t’u them se shpresoj që dita do të jetë e mirë”, ka thënë Han.
Ndërsa Zoran Zaev, pas takimit me Han, para mediave deklaroi se qëllimi i partisë së tij është që të pastrohen listat zgjedhore, por sipas tij për këtë të fundit, koha është mjaft e shkurtër.
“Edhe Gruevski është i vetëdijshëm se nuk mund të arrihen afatet dhe koha për t’u pastruar lista zgjedhore.. Qëllimi i opozitës është kristalizimi i kushteve para dhe gjatë zgjedhjeve. Pas takimeve bilaterale i presim konkluzat”, tha lideri i LSDM-së, Zoran Zaev.
Nga ana tjetër ish kryeministri, Nikolla Gruevski pas takimit me eurokomisarin Johannes Han, ka dhënë një koment mjaft të shkurtër me arsyetimin se po ngutet që të marr pjesë në hapjen solemne të një fabrike të re.
“Për këtë do të jap deklaratë kur t`i vijë rendi, tani nuk jap, pasi që jam duke u ngutur për të hapur fabrikë të re”, tha shkurt Gruevski.
Kurse kryetari i partisë shqiptare në pushtet BDI-së, Ali Ahmeti, ndryshe nga kolegët e tij, ka dhënë deklaratë për media para takimit me eurokomisarin Han.
Sipas tij zgjedhjet do të mbahen ashtu siç është e paraparë me Marrëveshjen e Përzhinos, pra me 24 prill, dhe të njëjtat duhet të jenë të lira dhe demokratike.
“Nuk mendoj se ka hapësirë të shtyhen zgjedhjet. Gjithçka varet pas konsultave me Han. Shtyrja e zgjedhjeve mund ta thellojë krizën, pasiguri për vendin, ekonominë. Ne kërkojmë që të gjitha standardet të plotësohen të ketë zgjedhje të lira dhe demokratike. Zgjedhjet të jenë të pranueshme për të gjitha palët. Nuk kemi diskutuar për detajet, por sipas të gjitha gjasave VMRO-s i takon të propozojë kryeministrin. Unë mendojë që të gjitha institucionet duhet të prononcohen për këtë çështje të japin vlerësimet e tyre deri ku kanë arritur me përgatitjet e zgjedhjeve”, ka deklaruar lideri i BDI-së, Ali Ahmeti.
Me takimin Han -Thaçi kanë mbaruar bisedimet bilaterale të krerëve te partive nënshkruese të Marrëveshjes së Përzhinos dhe eurokomisarit Han.
“Kemi marrëveshje se kur do të duhet të mbahen zgjedhjet”, kështu u përgjigj Menduh Thaçi në pyetjen e gazetarëve se kur do të mbahen zgjedhjet.
Pasdite pritet të mbahet edhe një mbledhje e përbashkët e 4 liderëve dhe euro-komisarit për të dalë më pas me kumtesën finale për datën e zgjedhjeve. /tesheshi.com/
