Raportuesi për Maqedoninë në Parlamentin Evropian dhe anëtar i Delegacionit për zbatimin e marrëveshjes për stabilizim dhe asocim të Serbisë, Ivo Vajgëll, paralajmëroi se tensionet e Ballkanit i shkaktojnë dëm rajonit dhe perspektivës në procesin e zgjerimit të BE-së.
“Në këtë moment, në shumë vende anëtare, mund të shohim rritje të mëdyshjes kur bëhet fjalë për procesin e zgjerimit dhe fokusimit të konsolidimit të Unionit, i cila është goditur nga bregziti, kriza financiare dhe e refugjatëve.
Diçka më joproduktive është rritja e tensioneve mes vendeve apo mosdurimi tradicional i bazuar në çështjet pseudohistorike”, deklaroi Vajgëll për Tanjug, duke komentuar kështu edhe përplasjen politike dhe diplomatike midis Shkupit dhe Beogradit.
Ai insiston se nëse rajoni dëshiron të mbajë perspektivën për zgjerimin, duhet të prezantohet si homogjen, i tërhequr si treg, por edhe partner i besueshëm, i cili do të paraqesë një vlerë të shtuar për stabilitetin dhe sigurinë evropiane.
“Tensionet, polemikat dhe referimi i debateve të vjetra ndëretnike janë të rrezikshme dhe të dëmshme për të gjitha vendet, të cilat marrin pjesë në to. Do të ishte e dobishme që liderët e Ballkanit të ishin të vetëdijshëm kur hyjnë në konflikte radikale verbale me fqinjët”, theksoi Vajgël.
Javën e kaluar Serbia ka kërcënuar Maqedoninë me tërheqjen e personelit të ambasadës së tyre në Shkup, në rast se ata votojnë pro anëtarësimit të Kosovës në UNESCO. /tesheshi.com/
