Kosova heq një pengesë jo të vogël në konkretizimin e heqjes së vizave për në BE që pritet të bëhet në vjeshtë.
Komisioni i Jashtëm i Parlamentit Europian ka miratuar një dokument, i cili i rekomandon Parlamentit në Strazburg që Brukseli të liberalizojë vizat për Kosovës.
Ky vendim i Komisionit përgjegjës do të thotë një procedurë thelbësore për vendimin pozitiv.
Tashmë e vetmja pengesë mund të jetë ndonjë veto prej ndonjë prej shteteve anëtare siç është Spanja apo greqia që nuk njohin Kosovën.
Anëtarët e Komisionit kanë miratuar këtë rekomandim me vlerësimin se Kosova ka regjistruar progres të dukshëm në implementimin e kritereve të vendosura për heqjen e vizave.
Në rekomandim vlerësohet se liberalizimi i vizave do të jetë një instrument i rëndësishëm në politikën e jashtme dhe atë të sigurisë të BE-së, si dhe do të shërbejë për kontaktet mes popujve. Votimi për heqjen e vizave kaloi me 38 vota pro, 7 kundër dhe 6 abstenim.
“Jam e bindur se qytetarët e Kosovës meritojnë heqjen e vizave sa më shpejt të jetë e mundur. Mungesa e perspektivës për të udhëtuar lirshëm vetëm për këtë pjesë të rajonit është e papranueshme dhe duhet të marrë fund. Tani gjithçka është në duart e politikanëve të Kosovës, ata duhet të ratifikojnë marrëveshjen e demarkacionit me Malin e Zi dhe shënojnë progres në ndëshkimin e rasteve të korrupsionit dhe krimit të organizuar”, deklaroi raportuesja për Kosovën në PE, Ulrike Lunaçek.
Me të njëjtat argumente komisioni i rekomandoi BE-së liberalizimin e vizave edhe për Ukrainën dhe Gjeorgjinë, përkatësisht me 42 vota pro, 3 kundër dhe 6 abstenim; dhe 43 vota pro, 5 kundër dhe 3 abstenim.
/tesheshi.com/
