Anëtarët e grupeve të ndryshme në Parlamentin Evropian i kanë dërguar një letër të përbashkët Presidentes së Komisionit Evropian, Ursula von der Leyen, duke kërkuar që të lejohen eksportet e pajisjeve mjekësore nga Bashkimi Evropian në vendet e Ballkanit Perëndimor.
Anëtarët e Partisë Popullore Evropiane, të Gjelbrit dhe Liberalët në PE kanë nënshkruar një letër ku thuhet se koordinimi evropian i përgjigjes ndaj pandemisë COVID-19 duhet të përfshijë edhe vendet e Ballkanit Perëndimor.
Aty është paralajmëruar që kufizimet e vendosura të eksportit në pajisjet mjekësore mund të sjellin pasoja serioze për rajonin.
“Sistemet shëndetësore në këto vende janë përgjithësisht më të dobëta, kjo është arsyeja pse vendet e Ballkanit Perëndimor kanë nevojë për mbrojtje të BE. Prandaj ju ftojmë të përfshini të gjashtë vendet e Ballkanit Perëndimor në Skemën e Autorizimit të Eksportit, i cili aktualisht mbulon shtetet anëtare të BE-së, si dhe Islandën, Lihtenshtajnin, Norvegjinë, Zvicrën dhe Mbretërinë e Bashkuar”, thanë parlamentarët e BE në letrën e tyre.
Siç u tha, vendet e Ballkanit Perëndimor gjithashtu duhet të jenë në gjendje të marrin pjesë në prokurimin e përbashkët të mallrave të rëndësishme për krizën aktuale.
“Banorët e Ballkanit Perëndimor ndjehen dhe jetojnë si evropianë. Edhe pse Bashkimi Evropian vazhdimisht e ka ndaluar procesin e zgjerimit, këto vende na kanë mbështetur për shumë vite, kur bëhet fjalë për migracionin dhe zonat e tjera. Eshtë radha jonë tani për të treguar solidaritetin”, thonë eurodeputetët.
Sipas tyre, pandemia e koronavirusit prek të gjithë, dhe se solidariteti i të gjitha vendeve evropiane mund të shpëtojë jetë. /tesheshi.com/
