Eurobarometri është një seri studimesh publike kërkimore të kryera nga Komisioni Evropian që nga viti 1973. Ai shqyrton një gamë të gjerë çështjesh aktuale që kanë të bëjnë me anëtarët e BE-së, por gjithashtu më gjerë.
Besimi në polici
Policisë më së shumti i besojnë finlandezët – 95 përqind, danezët – 93 përqind dhe suedezët – 87 përqind.
Më pak asaj i besojnë qytetarët e Maqedonisë, ku vetëm një e treta e qytetarëve të atyshëm e kanë këtë besim, afro 34 përqind, kurse 61 përqind e të anketuarve nuk e kanë fare. 43 për qind e sllovakëve kanë besim në polici, dhe më shumë se gjysma (53 përqind) nuk kanë besim në policinë e tyre.
Në Bullgari, 44 për qind e të anketuarve kanë besim në polici, ndërsa gjysma e të anketuarve nuk kanë.
Besimi i ulët në polici është edhe te pjesa tjetër e rajonit të Ballkanit. Më shumë se gjysma e shqiptarëve të intervistuar (54 përqind) kanë besim në policinë e tyre, kurse në Kroaci 55 përqind e të anketuarve.
Besimi në ushtri
Duke parë rezultatet e testit të besimit në ushtrinë kombëtare, shohim se finlandezët përsëri kanë më së shumti besim, 95 për qind.
Vendi i dytë është i ndarë midis Danimarkës dhe Francës, ku 88 për qind e të anketuarve kanë besim në ushtrinë e tyre kombëtare.
Më së paku besim në ushtrinë e tyre kanë përsëri qytetarët e Maqedonisë, ku mbi gjysma e të anketuarve (51 përqind) shprehin besim, ndërsa 41 përqind e të anketuarve nuk kanë besim në ushtrinë e tyre kombëtare.
Në Bullgari, 52 për qind e të anketuarve besojnë në ushtri, kurse në Sllovaki dhe Mal të Zi 57 për qind.
Në Serbi, 63 përqind e të anketuarve kanë besim në ushtrinë e tyre, ndërsa 31 përqind nuk kanë.
Dy të tretat e kroatëve (67 përqind) besojnë në ushtrinë e tyre dhe 30 përqind nuk kanë besim. 70 për qind e sllovenëve kanë besim në ushtrinë e tyre, kurse 24 për qind nuk kanë.
Eurobarometri i krahasoi rezultatet e pranverës nga maji 2017 me ato të nëntorit 2016, një periudhë në të cilën pati një numër të madh ngjarjesh.
Gjatë kësaj periudhe pati një numër të madh ngjarjesh, kryesisht një seri sulmesh terroriste, si në Berlin, Stokholm, Londër dhe Manchester.
Ka pasur edhe dështim të reformave në Itali, zgjedhjet parlamentare në Rumani, Holandë dhe Bullgari, zgjedhjet presidenciale në Austri, Hungari dhe Francë. Zgjedhjet janë karakterizuar kryesisht nga fitorja e kandidatëve pro-evropianë, veçanërisht në Austri, Holandë dhe Francë.
Kryeministrja britanike Theresa May ka aktivizuar Nenin 50 të Traktatit të Lisbonës për daljen e Mbretërisë së Bashkuar jashtë BE-së dhe Donald Trump është betuar dhe është bërë Presidenti i 45-të i Shteteve të Bashkuara.
Turqit kthejnë besimin në ushtri dhe polici
Duke krahasuar rezultatet në këto dy pika, vërehet se në atë periudhë të shkurtër një numër i madh turqish kanë rifituar besimin në polici (14 përqind) dhe në ushtri (17 përqind).
Ka shumë të ngjarë që ky kthim i besimit t’i atribuohet stabilizimit të situatës pas grusht-shtetit të dështuar dhe një serie sulmesh terroriste. Në të njëjtën periudhë, një numër dukshëm më i vogël i gjermanëve (10 përqind) tani beson në ushtrinë e tyre.
Rënia e besimit në polici është më e madhja në Irlandë, ku 11 përqind më pak të anketuar shprehin besim.
Te qytetarët e Maqedonisë, të cilët kanë më së paku besim në policinë dhe ushtrinë e tyre, për shkak të tensionit dhe ndërhyrjes në Kuvendin maqedon në fund të prillit 2017, pati një rënie disi të ndjeshme të besimit në polici (shtatë për qind), ndërsa në të njëjtën kohë në ushtri dy përqind.
Përgatiti Jeton Zenuni – /tesheshi.com/
