Nga Ornela Memushi
Sipas kursit zyrtar të këmbimit valutor të Bankës së Shqipërisë, një euro këmbehet sot me 133 lekë, 0.18 lekë më pak se një ditë më parë dhe duke arritur në një rënie me 1.12 lekënga fillimi i muajit qershor ku 1 euro u këmbye me 134.12 lekë.
Monedha euro ka pasur luhatje të vazhdueshme në kursin e këmbimit me monedhën vendase që prej dy vitesh duke sjellë mbiçmim të lekut. Kursi më i lartë i këmbimit euro-lekë ka qenë në po të njëjtën periudhë (qershor) të vitit 2011 me kurs këmbimi 142.54 lekë/euro.
Tashmë, euro ka humbur “lavdinë” e dikurshme duke pasur një trend rënës në tregun shqiptar por, kjo situatë pritet të ndryshojë pas muajit gusht me mbarimin e sezonit turistik dhe largimin e emigrantëve drejt vendeve ku jetojnë dhe punojnë.
Euro ka pasur luhatje edhe në bursat ndërkombëtare dhe kjo për disa shkaqe si: situata e paktrollueshme e borxhit grek, kriza e bankave italiane, zgjedhjet presidenciale në Francë etj. Megjithatë, menjëherë pas zgjedhjes së Emmanuel Macron si president i Francës i cili mbështet fuqishëm qëndrimin e Francës në BE, në tregun evropian euro pësoi rritje të ngadaltë.
Në vendin tonë, mbiçmimi i lekutndaj euros ka efekte pozitive dhe negative. Në tre mujorin e parë të vitit 2017, borxhi publik ka arritur në 68.42% e GDP ku pjesa më e madhe e borxhit është borxh i jashtëm. Në këtë situatë, vendi ynë ndodhet përballë mundësisë së pagimit të disa kësteve njëherësh duke përfituar nga kursi i këmbimit dhe në këtë mënyrë vlera e borxhit ulet, pra borxhi i jashtëm kushton më pak.
Nga ana tjetër, nënçmimi i euros dhe mbiçmim i monedhës vendase për një periudhë afatgjatë ka sjellë si pasojë shtrenjtimin e produkteve shqiptare në krahasim me produktet e vendeve të tjera.Kjo situatë e krijuar nuk është favorizuese për eksportet shqiptare pasi mallrat tona janë më pak konkuruese se sa mallrat e vendeve të tjera. /tesheshi.com/
