Uellsianët vazhdojnë rrugëtimin e tyre të suksesshëm në Euro 2016, duke arritur në çerekfinale të aktivitetit.
Në të dytin derbi britanik në Europian, Uellsi ka dalë fitues ndaj Irlandës së Veriut, në një ndeshje të përfunduar 1-0.
Një sfidë tipike e futbollit anglez, përballja mes Uellsit dhe Irlandës së Veriut pati shumë pak gjëra në pjesën e parë, me cilësi të munguar të lojës.
Lojtarët e Uellsit do ta shtonin ritmin në pjesën e dytë, dhe rezultati nuk do të vononte të vinte. Edhe pse nuk do të shënonte vetë, Gareth Bale do të kishte sërish pjesën e tij në golin e fitores. Një krosim i ulët prej tij nga e majta e sulmit, dhe mbrojtësi irlandezoverior McAuley do të detyrohej ta dërgonte topin në portën e vet.
Kjo është çerekfinalja e dytë e Uellsit në një turne të përmasave të mëdha, pas asaj në Kupën e Botës në vitin 1958.
Uellsi do të ndeshet në çerekfinale me fituesin e sfidës Hungari – Belgjikë. /tesheshi.com/
