Anglia dhe Uellsi do të takohen të enjten e 16 qershorit në Euro 2016, në një ndeshje për grupin B.
Në kuadër të masave të sigurisë dhe të shmangies së çdo lloj incidenti, tifozët e të dy ekipeve kombëtare janë paralajmëruar se do ta kenë të ndaluar përdorimin e alkoolit që nga mëngjesi i asaj dite gjer në mëngjesin tjetër.
Ndeshja do të luhet në Lens, në stadiumin “Stade Bollaert-Delelis”, por tifozëve pa bileta për ndeshjen
apo për zonën e tifozëve, të quajtur ndryshe “Fan zone”, u është kërkuar të mos udhëtojnë. Policia britanike u ka sugjeruar mbështetësve pa bileta të shkojnë në Lilë apo në ndonjë qytet tjetër për ta parë ndeshjen.
Autoritetet franceze do të jenë gjithashtu në gatishmëri, e do t’i kontrollojnë për alkool të gjitha makinat që do të hyjnë në Lens atë ditë.
Siç lajmëron BBC-ja, ndalimi i përdorimit të alkoolit do të vlejë dhe për ndeshjet e tjera që do të luhen në Lens, si për takimin Shqipëri – Zvicër të 11 qershorit, ashtu dhe për atë Çeki – Turqi të 21 qershorit.
Rreth 500.000 tifozë britanikë pritet të vërshojnë drejt Francës me nisjen e Euro 2016-tës, dhe gjysma e tyre do të jenë pa bileta. /tesheshi.com/
