Dy takimet e djeshme të grupit C kanë qenë të veçanta jo për nivelin e tyre të lojës, por për atë çfarë kanë prodhuar: eliminimin e së parës skuadër në këtë Europian, si dhe barazimin e parë pa gola.
Ukraina u duk mjaft pretenduese në fushatën përgatitore të këtij kampionati. I shënoi katër gola Rumanisë në një miqësore dhe fitoi ndaj saj, ashtu siç fitoi dhe ndaj Shqipërisë, me një paraqitje mjaft pragmatike dhe efikase.
Krejt ndryshe në ndeshjet zyrtare është shfaqur ajo. Humb të parin takim ndaj Gjermanisë, e me të njëjtin rezultat, 0-2, i dorëzohet dhe Irlandës së Veriut. Breshëri i rënë dje në sfidën ndaj irlandezoveriorëve sikur kërkonte të thoshte që ukrainasit nga shiu i Gjermanisë po binin në breshërin e Irlandës së Veriut.
Për Ukrainën kampionati ka marrë fund. E eliminuar, pa asnjë pikë, ndaj Polonisë do të luhet të martën vetëm për prestigj.
Ndërkaq, në mbrëmje, Gjermania dhe Polonia ofruan një 90-minutësh zhgënjyes, një barazim pa gola krejt pa shije.
Ky ishte barazimi i parë pa gola i Gjermanisë që prej dy vitesh. Më 13 maj të 2014-tës, gjermanët do të barazonin 0-0 në një miqësore po ndaj polakëve.
Një tjetër rekord negativ për gjermanët qenë gjuajtjet brenda kuadratit. Për herë të parë që nga 10
qershori i vitit 1988, kur ata përballeshin me Italinë, nuk ia dalin ta godasin në shenjë portën kundërshtare në 45 minuta.
Milik, sulmuesi i polakëve, mund të kishte bërë historinë nëse nuk do të gabonte në dy raste të pastra. Një mbrëmje e errët dhe për sulmuesin e palës tjetër. Götze nuk dha asgjë.
Një ndeshje e destinuar të përfundonte pa gola. Të dy ekipet mbajnë dy vendet e para në grupin C, me nga 4 pikë, e mjafton të mos humbasin në ndeshjen e fundit, dhe janë të kualifikuara. /tesheshi.com/
