Bashkimi Evropian planifikon të premtojë se valët e reja të zgjerimit në Ballkanin Perëndimor do të ndodhin në vitin 2025, por me kusht që shtetet të zgjidhin mosmarrëveshjet e ndërsjella, pohon një portal i respektuar EUobserver.
Portali po i referohet një draft dokumenti që supozohet të jetë miratuar nga Komisioni Evropian më 14 shkurt.
“Partnerët tanë në Ballkanin Perëndimor kanë një mundësi historike. Për herë të parë në histori, perspektiva e pranimit të tyre ka një kornizë kohore”, thotë një dokument strategjik, me një shpjegim se afati vlen për “skenarin më të mirë”.
“Me vullnet të fortë politik, reforma dhe zgjidhje të përhershme të çështjeve me fqinjët, Mali i Zi dhe Serbia mund të jenë gati për anëtarësim deri në vitin 2025”, thotë teksti i dokumentit për të cilin ishte në dijeni kjo media.
Gjithashtu, dokumenti parasheh që deri atëherë Shqipëria, Bosnja, Maqedonia dhe Kosova duhet të “përparojnë në mënyrë të konsiderueshme në rrugën evropiane” dhe se “negociatat e anëtarësimit duhet të ndodhin në fazën e mëvonshme”.
Dokumenti është një ndryshim i rëndësishëm në qasjen e Brukselit, sidomos pasi udhëheqësi i Komisionit Europian, Jean-Claude Juncker ka thënë në 2014 se nuk do të ketë zgjerim të ri në të ardhmen e parashikueshme.
Mali i Zi dhe Serbia kanë hapur tashmë negociatat e anëtarësimit, Shqipëria dhe Maqedonia presin këtë vit, ndërsa BeH po pret miratimin e statusit të kandidatit pas dorëzimit të përgjigjeve ndaj kërkesës së Komisionit Europian. Por dokumenti paralajmëron se mosmarrëveshjet e ndërsjellta midis shteteve mund të jenë pengesë për “planin ambicioz”.
“BE nuk do dhe nuk mund të importojë konflikte dypalëshe, kështu që partnerët tanë të Ballkanit Perëndimor duhet të zgjidhin urgjentisht të gjitha mosmarrëveshjet ekzistuese”, tha ai.
Për mosmarrëveshjen rreth kufirit, BE do të propozojë të shkojë në arbitrazhin ndërkombëtar në Hagë dhe se vendimet duhet të respektohen. Kjo vlen veçanërisht për marrëdhëniet midis Beogradit dhe Prishtinës, normalizimi i të cilave do të jetë vendimtar për përparimin e të dy vendeve në anëtarësim.
Programi i ri i “Juncker Balkan”, siç thekson EUobserver, do të formulohet gjatë presidencës bullgare që ka filluar që nga fillimi i këtij viti.
Unioni do të zhvillojë bisedime me Ballkanin Perëndimor më 18 maj në Sofje, i cili do të shënojë 15-vjetorin e samitit historik në Selanik, kur u hap për herë të parë perspektiva evropiane për rajonin. Gjithashtu, KE planifikon të publikojë raporte të rregullta të përparimit të këtyre shteteve në prill të këtij viti, sipas EUobserver. /tesheshi.com/
