Prej disa vitesh, policia europiane EUROPOL ka grumbulluar të gjitha të dhënat që vijnë nga grupet e mëdha shqiptare të trafikimit të drogës në Europë, të cilat kanë lidhje direkte me politikanë dhe zyrtarë të lartë shqiptarë, të cilët kanë ndihmuar në pastrimin e parave të krimit dhe janë pjesë e ryshfetit që vijnë nga droga.
Një zyrë e posaçme në Komisionin Europian ka grumbulluar në vite të gjitha raportet që flasin për aferat e mëdha korriptive në Shqipëri, të cilat pritet të jenë pjesë e hetimit nga ana e EULE|X-it shqiptar që do të nisë punën muajin e ardhshëm.
Bëhet fjalë për zhvatjen nw forma nga mw tw ndryshmet e rreth 3 miliardë eurove që kanë përfunduar në pasuri të patundshme, llogari bangare dhe aksione në biznese.
Burime diplomatike bëjnë tw ditur se një ekip i përbashkët nga EURALIUS, OBDAT dhe ILDKP ka nisur prej kohësh një hetim të detajuar për pasuritë e vëna nga zyrtarë e politikanë, por edhe aksionet në bizneset e mëdha shqiptare.
Mësohet se ekziston një raport i hollësishëm për bankat apo bizneset tregtare e prodhuese në vend, që pasqyron lidhjet e politikanëve me këta grosistë që kanë marrë pjesën e luanit nga tenderat dhe kontratat e shtetit.
Në këtë raport bëhet e ditur se paratë e dhëna nga qeveritë apo ministrant kanë përfunduar po në duart e tyre, nëpërmjet tenderave që u janë dhënë kompanive që ata kontrollojnë.
Ndërkaq, një grup ekspertësh të ILDKP-së dhe të DISK-së, kanë nisur prej dy muajsh një punë shumë të thjeshtë, pas kërkesës së komunitetit ndërkombëtar, të cilët asistojnë projektin financiarisht dhe në pikëpamjen e asistencës teknike: ata kanë fotografuar një nga një, të gjitha pronat e paluajtshme, banesat, makinat, vilat dhe bizneset të politikanëve, zyrtarëve të lartë, gjyqtarëve dhe prokurorëve shqiptarw.
Dosja është mbyllur, madje mësohet se ka nisur edhe verifikimi sipas deklaratave zyrtarë të dorëzuar nga ofiqarët e shtetit.
Siç mësohet, dosja nuk do të ketë vetëm banesat apo automjetet e deklaruara, por edhe ato që nuk janë nën emrin e zyrtarëve por që në fakt banohen apo administrohen prej tyre.
Një hetim i hollësishëm ka zbardhur skemën e transferimit të parave dhe të ardhurave nga këto prona, apo e përdorimit të tyre.
Në fund do të hartohet një raport i hollësishëm që do t’i dorëzohet Prokurorisë Speciale apo SPAK, por edhe Grupit Ndërkombëtar të Monitorimit, i cili do të merret direkt me procesin e rivlerësimit të gjyqtarëve dhe prokurorëve, apo siç quhet ndryshe vettingu.
Dosja është një investigim i mirëfilltë i përgatitur nga pajisje speciale të cilat janë siguruar nga ndërkombëtarët.
Pikërisht kjo ka qenë puna e partnerëve: asistimi me pajisje që arrijnë në fotografimin e pastër dhe të saktë të pronave dhe njerëzve në to.
Operacioni është kryer në sekret të plotë, me grupe të vogla, të cilat nga largësi të mëdha dhe në lartësi të duhur kanë fotografuar dhe filmuar gjithçka nga lëvizjet nga pronat e ofiqarëve, njerëz që hyjnë që dalin; pra ka qenë e gjitha një operacion gati-gati policor.
Burime të sigurta bëjnë të ditur që të gjithë këtë operacion e ka mbështetur një njësi e posaçme hetimore e Policisë së Shtetit, e cila ka të gjitha kompetencat ligjore për të hetuar.
Siç mësohet, i gjithë materiali nuk do të ketë asnjë rëndësi proceduriale si provë, por si indicje për nisjen e hetimit që do të jetë kompetencë e Byrosë Kombëtare të Hetimit dhe SPAK.
Një raport i fundit i KLSH-së bën të ditur se rreth 1 miliard euro kanë firuar nga buxheti i shtetit si pasojë e abuzimit me ligjin. Edhe kjo do të jetë pjesë e hetimit të EULEX-it shqiptar, ku do të jenë prokurorët e SHBA dhe BE si dhe SPAK.
Kontrolli i Lartë i Shtetit ka bërë kallëzim penal në prokurori dhe bëhet fjalë për rreth 400 zyrtarë.
Dosjet e tyre janë në prokurori dhe me ngritjen e SPAK pritet të rihapen, ku nëse vërehet se kanë kryer shkelje atëherë do vuajnë pasojat e tjera, përveç dënimit.
Prokuroria e Posaçme Antikorrupsion, që do të ngrihet në kuadër të Reformës në Drejtësi, do të ketë një zyrë vetëm për bashkëpunimin me ndërkombëtarët, me qëllim gjetjen e parave të ricikluara.
SPAK do të bashkëpunojë me FBI, DEA apo Interpol për të gjurmuar llogaritë bankare të gjithë personave të dyshuar.
Sipas një raporti të “Global Financial Integrity”, nga Shqipëria vitet e fundit kanë dalë rreth 1.5 miliardë dollarë, para të vëna nga korrupsioni, krimi dhe droga.
Bëhet fjalë për një shifër vërtet të lartë dhe shumica e parave kanë përfunduar kryesisht në Qipro, Zvicër, Maltë, apo dhe ishujt Kajman.
Të dhënat bazohen edhe mbi raportet e Drejtorisë së Parandalimit të Pastrimit të Parave dhe raporteve ndërkombëtare. Drejtoria në varësi të Ministrisë së Financave ka treguar se paratë dalin në mënyrë tokësore, ndërsa sipas një raporti të Byrosë së Sigurisë Diplomatike, pjesë e Departamenti Amerikan të Shtetit, fshihen kryesisht në Zvicër dhe vende si Malta, etj.
Ndërsa vetë DASH, në raportin e 2016 thekson se një pjesë e madhe e parave të korrupsionit janë investuar në bregdet. Pra, me nisjen e reformës, do nisë dhe gjurmimi i tyre. /tesheshi.com/
