EULEX shtyn marrjen në pyetje ndaj deputetit të PDK-së Azem Syla, ish-shefi i shtabit të Përgjithshëm i UÇK-së, i cili akuzohet për krime lufte dhe korrupsion. Këtë e ka bërë pa asnjë shpjegim.
“Jemi njoftuar se seancat e parapara të mbahen këtë javë në rastin e pronave janë shtyrë për shkak se ende nuk ka hyrë në fuqi ligji për mandatin e EULEX-it,” tha avokati i Sylajt, Tahir Rrecaj.
Seancat e mundësisë së veçantë hetuese ishin caktuar pas kërkesës së prokurorit të rastit Danilo Cecarrelli.
Në seancat e mundësisë së veçantë hetuese, një panel prej 3 hetuesish mund të marrin në pyetje dëshmitarë që mund të ndodhë të mos jenë të pranishëm në procesin e mundshëm gjyqësor dhe dëshmia e dhënë në këto seanca konsiderohet pastaj si e dhënë në seancat gjyqësore.
Nuhi Uka, Artan Vila, Hajrullah Berisha, Sabedin Haxhiu, Lubisha Vujoviq, Ilaz Syla dhe Avni Maxhuni ishin arrestuar më 27 prill të këtij viti pas një aksioni masiv të EULEX-it dhe Policisë së Kosovës, ndërsa Azem Syla ishte dorëzuar në polici dy ditë më pas.
52 persona dyshohen nga prokuroria se kanë tjetërsuar prona shtetërore në mënyrë joligjore në regjionin e Llapnasellës, për çka të gjithë të dyshuarit janë deklaruar të pafajshëm.
/tesheshi.com/
