Edhe pse është thënë se Misioni i EULEX-it do të largohet nga Kosova pas qershorit, kjo siç duket nuk do të ndodh.
Shefja e EULEX-it, Alexandra Papadopoulou, ka bërë të ditur se edhe pas përfundimit të mandatit, EULEX-i në rolin këshillëdhënës do të vazhdojë të bashkëpunojë ngushtë me qeverinë në fuqizimin e mëtutjeshëm të sundimit të ligjit.
“Pas 15 qershorit të këtij viti, mandati i EULEX-it në Kosovë, do të jetë këshillëdhënës”, ka thënë pas një takimi të zhvilluar të premten me kryeministrin Ramaush Haradinaj.
Në komunikatë dërguar nga zyra e kryeministrit, më tej thuhet Haradinaj theksoi se sukseset e EULEX-it dhe të Kosovës janë të përbashkëta dhe në funksion të ndërtimit të besimit të qytetarëve për institucionet kosovare.
Haradinaj u informua për rrjedhën e përfundimit të mandatit të EULEX-it dhe procesin e shkëmbimit të letrave në mes të Presidentit dhe Përfaqësues së lartë të BE-së, Federica Mogherini.
Në këtë takim, është biseduar për përpjekjet e vazhdueshme të qeverisë për fuqizimin e sundimit të ligjit, si shtyllë qendrore për zhvillimin ekonomik dhe integrimin evropian të vendit. /tesheshi.com/
