Nën një eufori të dukshme në vitin e 11 të qeverisjes, kryeministri Rama pretendon se Shqipëria që ai drejton do ketë një tjetër kampione në 2030-ën dhe pikërisht në aspektin qartazi më të dobët të saj, arsimin.
“Synimi ynë është që Shqipëria 2030 të jetë kampione në rajon në të gjithë aspektet dhe të anëtarësohet në Bashkimin Evropian”, tha gati pabesueshëm i pari i qeverisjes, gjatë një takimi në shkollën “Kosova” në Tiranë” lidhur me sigurinë në shkolla, nga ku kumtoi shifrën e 240 oficerëve të sigurisë në mbarë vendin, të angazhuar për këtë siguri.
“Kemi arritur të ndërtojmë dhe të rindërtojmë në këto 10 vite më shumë se sa në 40 vjet të marra së bashku përpara fillimit të kësaj dekade”, tha ai, duke shtuar se “përtej kësaj ne nuk jemi fokusuar vetëm te godina e infrastruktura, por në mënyrë të posaçme dhe te fuqizimi i autoritetit të mësuesit dhe motivimi i vazhdueshëm i trupës mësimore”.
“Sot kemi arritur me ndërhyrjen e fundit të muajit qershor që pagën mesatare të mësuesve ta kemi 950 euro. Është një rritje shumë domethënëse brenda të cilës ka edhe një përshkallëzim sipas eksperiencës dhe kritereve të vendosura në një rrugëtim të çdo mësuesi e mësuese ku ata që dallohen paguhen më mirë, por ne nuk kemi ndërmend të ndalemi këtu”, theksoi Rama.
E megjithatë, perceptimi i përgjithshëm është se arsimi në degradim të pandalshëm. /tesheshi.com/
