Policia suedeze shpërndau të shtunën qindra kundërshtarë të masave kufizuese të futura për të frenuar përhapjen e virusit Corona dhe protestat në kryeqytetin Stokholm u organizuan pavarësisht nga ndalimi i tubimeve të mëdha.
Policia bllokoi një urë në qendër të qytetit dhe njoftoi në faqen e saj të internetit se po negocionte me organizatorët e tubimit, duke u përpjekur të bindnin protestuesit të shpërndaheshin, raporton Reuters.
Pamjet televizive tregojnë se policia shpërndan dhe “shtyn” disa protestues, dhe sipas një raporti të policisë, një nga anëtarët e tyre u plagos lehtë dhe u transportua në spital.
“Policia ka marrë një vendim për të ndaluar mbledhjen e paautorizuar që është në zhvillim,” u njoftua të shtunën në faqen e internetit të policisë së Stokholmit.
Më parë këtë javë, organizatori i protestës Filip Sjostrom i tha medias lokale se ai priste që rreth 2,000 njerëz të bashkoheshin në demonstratë, të njoftuar në Facebook.
Sipas pamjeve televizive, disa qindra banorë të kryeqytetit u mblodhën dhe sipas të përditshmes suedeze Dagens Nyheter, protestuesit mbërritën nga pjesë të ndryshme të Suedisë, një vend ku është në fuqi ndalimi i tubimeve publike të më shumë se tetë njerëzve.
Vala e tretë e pandemisë
Shteti nordik, i cili ka një popullsi prej 10 milion, regjistroi të premten 4831 raste të reja të koronavirusit dhe 26 vdekje. Deri më tani, gjithsej 13,003 njerëz kanë vdekur si rezultat i COVID në Suedi.
Qeveria njoftoi muajin e kaluar se do të shkurtojë orët e hapjes së restoranteve, bareve dhe kafeneve dhe do të forcojë masat mbi numrin e blerësve, në një përpjekje për të parandaluar një valë të tretë të pandemive.
Qeveria suedeze e qendrës së majtë gradualisht ka forcuar masat kufizuese që nga fundi i vitit të kaluar, por deri atëherë ka lejuar që shumica e shkollave, restoranteve dhe ndërmarrjeve të qëndrojnë të hapura.
Disa qindra njerëz u mblodhën gjithashtu në Vjenë për të protestuar ndaj masave COVID.
Disa nga protestuesit mbanin pankarta ku shkruhej “Kurz duhet të ikë”, duke iu referuar kancelarit Sebastian Kurz, njoftoi agjencia e lajmeve APA.
Policia kontrolloi pajtueshmërinë e masave epidemiologjike të demonstruesve, duke përfshirë distancën dhe mbajtjen e maskave.
Rreth 200 anti-protestues u mblodhën në një tubim biçikletash. /tesheshi.com/
