Pas dekretimit të datës së zgjedhjeve të ardhshme nga presidenti Meta, 25 prilli, dy kampet kryesore politike janë përfshirë në ethe përgatitjesh për atë që mendohet se do jetë gara me e fortë elektorale në 30 vite pluralizëm.
Kjo pasi opozita, pasi ka ezauruar 8 vite si e tillë, pretendon se duhet të vijë në pushtet, ndonëse ka kuotat më të ulëta elektorale qysh nga themelimi. Pos kësaj, është pa asnjë lloj pushteti, pasi zgjodhi të bojkotojë dhe zgjedhjet lokale.
Megjithatë, ajo shkon larg ku veç bindjes në fitore, ofron dhe shifrën e 84 mandate që beson se do marrë. “Nëse opozita do të fitonte 84 mandate do ndryshonte ligjet. Asgjë nuk është e shkruar se opozita nuk i merr“, tha Oerd Bylykbashi një ditë më parë.
Nga ana tjetër, Rama është treguar më me “këmbë në tokë”, kjo sa i përket numrit të mandateve të synuara, edhe pse synon mandatin e tretë, gjë që do ishte hera e parë në 30 vite.
Në një takim me drejtues qarqesh të PS, ai tha se synohen 74 mandate, nga 78 të marra në 2017.
“Synojmë 74 mandate, kjo është krye-sfida jonë”, ka thënë Rama. /tesheshi.com/
