Nga Blendi Gashi
Gjykata Speciale e cila në pjesën e parë të këtij viti pritet të ngrit aktakuzat dhe më pas arrestoi disa prej njerëzve të fuqishëm të skenës politike që më parë kanë qenë udhëheqës të UÇK-së ka bërë që të nis qysh tani “lufta” mes përfaqësuesve të dy partive në pushtet PDK e LDK-së.
Ndërsa zyrtarë të kësaj të parës dhe jo vetëm mund të jenë cak i Speciales, zyrtarë të dytës po i “fërkojnë” duart që drejtues të lartë të PDK-së të kapen nga kjo gjykatë, dhe më pas të përfitojnë politikisht, pra ta rrëzojnë nga pushteti këtë parti që prej dhjetë vitesh është në pushtet.
“Luftën” e ka dhez deputeti i LDK-së Adem Salihaj, i cili është i njohur për kritikat e ashpra dhe drejtimin e gishtit drejt Shërbimit Informativ të Kosovës (SHIK) që është udhëhequr nga Kadri Veslei për vrasjet e bashkëpunëtorëve më të afërt të presidentit të ndjerë Ibrahim Rugova.
Salihaj, i cili i thotë se i ka pshtuar një atentati pas lufte, shprehet se Specialja do ta godet fuqishëm PDK-në, pasi sipas tij do i kapë drejtuesit më të lartë të këtij subjekti.
“Unë mendoj se kjo pjesa e lartë është e futur në krim dhe korrupsion, këta janë përgjegjësit. PDK-ja, mund të mbetet pa lidershipin që e ka tash”, ka thënë Salihaj, në një emision televiz.
“LDK përgatiti dosje kundër ushtarëve të UÇK-së”
Kjo deklaratë e ka nervozuar jo pak anëtarin e PDK-së Gani Koci, njëherit zv.ministër, i cili përveç që e quan të turpshme, akuzon LDK-në për përgatitjen e dosjeve nga ushtarëve të UÇK-së.
“Adem Salihaj po i fërkuaka duart kur ta lë Gjykata Speciale pa lidership Partinë Demokratike te Kosoves! Po nuk di se çka do ferkoj pastaj kur të “ndodhë” kjo. Apo ndoshta do tu kthehet kërkesave që ai ua bënte përgjegjësve të burgjeve ku ishte si i burgosur ‘politik’ që ta lironin se ishte i ‘prekur’nga hiv virusi. Apo sërish do jetë pjesë e atij komisionit të famshëm të krijuar nga LDK-ja në krijimin e dosjeve për ushtarët e UÇK-së, që aq shumë u shërbyen me to Karla Del Ponte dhe Salustro dhe tani ta ndihmoj Gjykatën Speciale. Ose mund te ndodh që t’i shkrep revolja rastësisht dhe të trumbeton pastaj për ‘tentim atentati’!
Adem Salihaj, është mirë t’i shëron komplekset e tij e të mos i fërkon duart me cka nuk duhet!
Turp që kaq shumë i gëzohet kësaj!”, ka thënë Koci, për tesheshi. com.
Se LDK ka përgatit dosje kundër UÇK-së e ka thënë edhe bashkëpartiakja e Kocit, deputetja Ganimete Musliu e cila në seancën e 27 marsit të vitit 2015, tha se degë të LDK-së në vitin 2000 kanë dorëzuar mijëra dosje në Hagë për pjesëtarët e UÇK-së”.
“Ju deputet (Armend Zemaj e Doruntinë Maloku deputet të LDK-së) tash e shumë kohë flisni dhe shpërndani shpifje dhe deklarata monstruoze të paqena kundër UÇK-së protagonistëve të saj. Ju paraqiteni si engjëj apo përfaqësues engjëjsh dhe bëni sehir sa herë sa i përket gjykatës special . Ju edhe vrasjet për motive të ulëta kriminale përpiqni t’i jepni ngjyrime politike. Ju kujtohen deklarimet të zyrtarëve ndërkombëtar në rastin e vrasjes së Tahir Zemajt kur thoshin, ‘u vra një kriminel nga kriminelët’. Të nderuar deputet, partia e Zemajt tash e 17 vite ka mbledhur dëshmi të rrejshme kundër UÇK-së”, ka thënë Musliu.
Kryeprokurori i Gjykatës Speciale për krime lufte në Kosovë, David Schwendiman, gjatë një konference për media të mbajtur më 15 shtator në Hagë ka deklaruar se do të punojë me “drejtësi, energji dhe pa frikë”, në procesin e hetimeve që mund të përfshijnë personalitete të larta politike të Kosovës.
Ndërsa administratorja e Dhomave të Posaçme, Fidelma Donlon ka pohuar se gjykata shpreson të fillojë veprimtaritë juridike në pjesën e parë të vitit 2017, duke përshtatur rregullat, procedurat, para se kryeprokurori të ngritë akuzat ndaj cilido të pandehur.
Ndryshe, gazetari Milazim Zeka në gusht të 2015-tës publikoi një listë me emra që sipas tij do të kapen nga Specialja.
Sipas tij do të gjykohen, Hashim Thaçi, Kadri Veseli, Agim Çeku, Azem Syla, Xhavit Haliti, Shaip Muja, Fatmir Limaj, Daut Haradinaj, Blerim Kuçi, Rexhep Selimi, Lahi Brahimaj, Bislim Zyrapi e Ajvaz Berisha. /tesheshi.com/
