Nga Ylli Pata
Lulzim Basha e ka marrë aq seriozisht betejën e 11 shtatorit në Dibër sa kërkon ta fitojë pastër, me arsye, që opozita të ketë një gur kilometrik për të rifilluar betejën politike në avancë.
Dhe për këtë ai ka thirrur në ndihmë jo vetëm të gjithë strukturën e Dibrës, e cila është e dërrmuar si pasojë e largimit të gjithë ish-drejtuesve që nga ish-kryetari Rrahim Kaleci, por edhe ish-figura të PD-së që janë mënjanuar me dashje nga lidershipi i 2013-s.
Kështu janë parë në krah të kandidatit për kryetar bashkie të Dibrës, Sherefedin Shehu, edhe ish-ministri i Jashtëm, Besnik Mustafaj, por edhe ish-deputeti dibran, një nga ekspertët më të mirë të ekonomisë, Selami Xhepa.
Megjithatë, peshën më të madhe në mitingun przantues të PD-së që duhet thënë ishte eksploziv nga pjesëmarrja dhe entuziazmi e ka dhënë Besnik Mustafaj, i cili foli për “rikthimin e shpresës si në vitet 90”. Shkrimtari i talentuar i rendit fjalët bukur por duhet thënë se marrja e tij me urgjencë nga Basha në Dibër është gjetje jo vetëm politike, por edhe elektorale.
Besnik Mustafaj e ka marrë gruan nga Peshkopia. Donika Greva është pjesë e një familje të njohur qytetare me rrënjë nga Greva e Maqellarës, andej nga është edhe Monika Kryemadhi, bashkëshortja e Ilir Metës me origjinë.
Familja e bashkëshortes së Mustafajt, edhe pse dhëndërri i tyre u bë shumë i madh në pushtet, ata kurrë për 25 vjet nuk u përzjenë me politikën. Dhe kjo erdhi edhe nga dëshira e Donika Mustafajt, por edhe nga Besniku që respektoi vullnetin e miqësisë dibrane.
Në Peshkopi flitej shumë për mbështetjen që dhëndrri nga Tropoja i jep jo vetëm të afërmëve të gruas por edhe dibranëve të tjerë, sidomos kur ishte ambasador në Paris.
Dhe për këtë ka marrë bekime e fjalë të ngrohta. Por pas 25 vjetësh Mustafaj e thyen këtë situatë për të “mbështetur Sherefedinin, por edhe shpresën e dibranëve”.
Zbritja në fushë e ish-shefit të diplomacisë shqiptare, një nga politikanët më virtuozë e babaxhanë, tregon se ka një pakt më të madh të tij me Lulzim Bashën dhe Peshkopia është vetëm fillimi.
Mustafaj siç duket do t’i rikthehet fuqishëm selisë blu si në kohët e vjetra. Po cili është pakti i tij me Bashën?!
Kjo ende nuk dihet dhe për këtë nuk flet as vetë Besnik Mustafaj në intervistën e dhënë në gazetën “Panorama” edhe pse i pyetur për ardhmërinë dhe për paktin e tij me Lulzim Bashën.
Por, sipas të gjitha gjasave, do të kemi një kontratë të re që Basha synon ta risjellë në PD.
Mos është si “këshilli i të urtëve të Ramës”?!
Le ta shohim… /tesheshi.com/
