Selia e zgjedhjeve e Presidentit Donald Trump ka njoftuar se ai nuk do të lëshojë më akreditime për reporterët në Bloomberg News, një agjenci në pronësi të kandidatit të mundshëm për të qenë rivali i tij demokrat, Michael Bloomberg. Eshtë ky sinjali i parë i etheve të fushatës së 2020-ës.
Pas njoftimit zyrtar për kandidimin e Bloomberg, agjensia e tij deklaroi se nuk do të raportonte për kandidatët për presidentë demokratë, përfshirë dhe vetë Bloomberg dhe rivalët e tij brenda kampit demokrat, por do të monitorojë aktivitetet e Trump gjatë fushatës.
Me akreditim, gazetarët mund të kenë më lehtë qasje në mitingje parazgjedhore dhe ngjarje të tjera, si pjesë e fushatës zgjedhore presidenciale të nëntorit 2020.
Qytetarët e zakonshëm duhet të blejnë një biletë dhe të presin në linja të gjata për të arritur në tubimin parazgjedhor.
“Meqenëse ata kanë treguar hapur paragjykimin e tyre, selia e Trump nuk do të lëshojë më akreditime për përfaqësuesit e Bloomberg Neës për mitingje parazgjedhore dhe ngjarje të tjera fushate”, tha shefi i shtabit të zgjedhjeve të Trump, Brad Parscale.
“Ne do të vendosim nëse do t’u përgjigjemi gazetarëve individualisht, ose nëse do t’i përgjigjemi pyetjeve të Bloomberg News, rast pas rasti,” shtoi ai.
Miliarderi Bloomberg, ish-kryetari i bashkisë së Nju Jorkut, njoftoi në fund të nëntorit se po kandidonte për garën për nominimin e presidentit demokrat, duke iu bashkuar listës së gjatë të kandidatëve.
77- vjeçari Bloomberg, një nga amerikanët më të pasur, e ka ndryshuar plotësisht mendjen që nga marsi, kur tha se nuk do të garonte.
Bloomberg, i radhitur në vendin e tetë në listën e Forbes, të amerikanëve më të pasur, i vlerësuar me 53.4 miliardë dollarë pasuri, mund ta financojë fushatën më vete dhe të shpenzojë miliona dollarë për reklama dhe punësimin e njerëzve në fushatën e saj.
Ai e filloi fushatën në një kohë kur dy prej kandidatëve me shanset më të larta për të fituar nominimin për presidentin demokrat – Elizabeth Warren dhe Bernie Sanders – po “godasin” miliarderët dhe premtojnë të vendosin taksa të reja për më të pasurit. /tesheshi.com/
