Rusia vazhdon të dërgojë trupa në kufirin e Ukrainës dhe ka të ngjarë të kryejë një sulm ushtarak “të kufizuar” ndaj vendit, tha të mërkurën drejtori i shërbimit të kundërzbulimit të Estonisë.
Sulmi do të përfshijë raketa dhe pushtimin e “terrenit kyç” në Ukrainë, tha Mikk Marran.
“Vlerësimi ynë tani është se ata do të shmangin qytetet me popullsi të madhe pasi duhen shumë trupa për të kontrolluar ato zona. Por nuk është e qartë se çfarë mund të bëjnë forcat ruse”, tha Marran në një konferencë për shtyp me rastin e prezantimit të raportit vjetor të agjencisë së tij.
Një tjetër mundësi mund të jenë luftimet intensive nga dy rajone renegate pro-ruse në Ukrainën lindore.
Një përshkallëzim i tillë është “shumë i mundshëm” dhe në këtë mënyrë “Rusia ndoshta do të jetë në gjendje të mohojë bindshëm (përfshirjen e saj) dhe të shmangë sanksionet,” tha ai.
“Nëse Rusia ka sukses në Ukrainë, do ta inkurajojë atë të rrisë presionin ndaj Balltikut në vitet në vijim”, tha ai, duke shtuar se “kërcënimi i luftës është bërë një mjet kryesor politik për Putinin”.
Inteligjenca estoneze e di se rreth 10 grupe luftarake të ushtrisë ruse po lëvizin drejt kufirit ukrainas, ku tashmë janë vendosur 100 grupe luftarake, ose rreth 170,000 ushtarë, tha Marran.
Këtu përfshihen ushtarë që zakonisht vendosen rreth Ukrainës, por edhe ushtarë në Bjellorusi të dërguar në stërvitje ushtarake pranë kufirit ukrainas.
Disa nga ata ushtarë ka të ngjarë të qëndrojnë në Bjellorusi pas 20 shkurtit, kur të përfundojnë stërvitjet, gjë që shqetëson NATO-n, e cila përfshin Balltikun, tha Marran.
“Kjo do të zvogëlonte kohën për t’u përgatitur për një sulm në Balltik.” /tesheshi.com/
