Rusia dhe Kina po përdorin pandeminë për të promovuar interesat e tyre në Evropë, tha të hënën Sekretari i Mbrojtjes i SHBA Mark Esper, duke e vlerësuar Kinën si “dashakeqe” në promovimin e pajisjeve telekomunikuese të Huawei, raporton Reuters.
“Shtetet e Bashkuara janë të vetëdijshme që disa vende do të përpiqen të përdorin pandeminë për të investuar në industri dhe infrastrukturë kryesore, me implikime afatgjata të sigurisë”, tha Esper për La Stampa, duke iu përgjigjur pyetjes nëse Kina dhe Rusia kërkojnë të ndikojnë në Itali duke dërguar ndihmë .
“Kundërshtarët e mundshëm pothuajse me siguri do të përpiqen të promovojnë interesat e tyre dhe të sfidojnë ndarjet në NATO dhe Evropë,” tha ai. “Huawei dhe 5G janë një shembull i rëndësishëm i këtij veprimi dashakeq nga Kina.”
Disa zyrtarë amerikanë akuzojnë Kinën për pandeminë e koronavirusit.
Sekretari i Shtetit Mike Pompeo tha të dielën se Uashingtoni ka prova që virusi erdhi nga një laborator kinez, gjë të cilën Pekini e kundërshton me forcë.
Të dy Kina dhe Rusia po ndihmojnë Italinë, duke dërguar mjekë, pajisje mjekësore dhe maska për fytyrën.
SHBA ka rekomanduar prej kohësh që vendet e tjera të bojkotojnë Huawei-n, prodhuesi më i madh në botë i pajisjeve të telekomunikacionit, në ndërtimin e rrjeteve të reja 5G, dhe që ata të shqyrtojnë nga afër pajisjet kineze të ZTE.
Uashingtoni paralajmëron që Kina mund të përdorë këto pajisje për spiunim.
Huawei dhe ZTE mohojnë që pajisjet e tyre janë një kërcënim për sigurinë.
“Varësia nga furnizuesit kinezë mund të bëjë që sistemet kryesore të bëhen të prekshme nga ndërhyrjet, manipulimet dhe spiunimi. Ky do të ishte një rrezik për kapacitetin tonë për komunikim dhe shkëmbim të inteligjencës,” tha Esper.
Ndihma ruse, përfshirë personelin mjekësor ushtarak, ka tërhequr vëmendjen për ndihmën e kufizuar të ofruar për Italinë nga Bashkimi Evropian, me zyrtarë evropianë dhe NATO, të cilët e interpretojnë atë në një kontekst gjeopolitik. /tesheshi.com/
