Nga Blendi Gashi
Nuk ka raport ndërkombëtarë që nuk jep vërejtje serioze për Kosovën dhe njëherit konstaton se shteti i cili lindi para tetë vitesh ka shumë sfida para vetës.
Së fundmi edhe organizata joqeveritare, Freedom House, që vëzhgon parametrat demokratikë të vendeve të botës, thekson se Kosovën e presin shumë punë, derisa vlerëson se shteti ynë është futur në “rrugë pa krye” dhe se strukturat qeveritare të ndërtuara për të mbajtur paqen, janë duke penguar përparimin.
Për më keq, Kosova përshkruhet si “regjim gjysmë i konsoliduar autoritar”, derisa si sfidë kryesore përmendet papunësia alarmante, pasi Kosova zë pozitën më të keqe në rajonin e Ballkanit Perëndimor.
Por përkundër këtyre vërejtjeve serioze, qeveria e Kosovës hesht dhe vazhdon të sillet sikur kosovarët janë populli më i lumtur në botë, edhe pse institucionet e vendit raportin në fjalë do të duhej ta marrin si një kritikë, dhe të punojnë për të përmirësuar vërejtjet që jepen në vazhdimësi.
Por sa është pasqyrim i realitetit ky raport sipas opozitarëve dhe analistëve?
Analistët politikë dhe përfaqësuesit e partive politike opozitare në Prishtinë, vlerësojnë se raporti i Freedom House ku flet për sfidat e funksionimit të shtetit të Kosovës, është tejet real.
Frashër Krasniqi, zëdhënës i Vetëvendosjes, ka thënë se në raporti i Freedom House ka vërtetuar së paku ato gjëra që Lëvizja Vetëvendosje i ka thënë në vazhdimësi.
“Kosova po shndërrohet në shtet autoritar dhe këtë e thotë edhe ky raport. Korrupsioni, kapja e sistemit të drejtësisë, kontrolli i medieve, janë rritur, dhe edhe kjo thuhet në raport. Kosova është vendi që ka më së shumti papunësi në rajon, edhe kjo thuhet në raport. Të gjitha këto Lëvizja Vëetëvendosje ka kohë që i thotë dhe do t’i përsëris edhe më tutje. Ne nuk mendojmë që me këtë qeveri vendi ynë do të bëhet funksional, demokratik dhe i zhvilluar.“, ka deklaruar Krasniqi, për tesheshi.com.
Mjegulla në Kosovë po prodhohet nga “ujqit e informalitetit”
Analisti politik, Fadil Lepaja, thotë se shtendërtimi i Kosovës po përballet me telashe të mëdha, por nuk pajtohet me konkludimin se vendi është në një rrugë pa krye.
Lepaja, në një prononcim për portalin tesheshi.com, thotë se mjegullën në vend po e prodhojnë siç i quan ai, “ujqit e informalitetit”, që sipas tij kanë hedhur kthetrat mbi institucione dhe organizma ekonomik, social e politik të vendit.
“Sikur nuk mjafton kjo kanë ndjellur kendejpari edhe ujqit e rryer të informalitetit rajonal e më gjërë duke u rehatuar në krye të vendit dhe duke krijuar huti dhe depresion të përgjithshëm. Besoj se procesi rajonal i dekriminalizimit që po zhvillohet në paradhomën e Evropës të quajtur Ballkani perëndimor të na përfshije edhe neve si vend i cili ka shumë nevojë për ndihmën ndërkombëtare për tu përballur me krimin dhe korrupsionin që e ka ngulfatë vendin”, thotë Lepaja, për tesheshi.com.
Ndryshe, në raportin e Freedom House, Kosova zë pozitën më të keqe në rajonin e Ballkanit Perëndimor sa i përket papunësisë. Norma e përgjithshme e papunësisë në Kosovë, në vitin 2014, ka qenë mbi 30 për qind, ndërsa e të rinjve 61 për qind.
Në raportin e organizatës Freedom House, mbi të drejtat politike dhe liritë civile, Kosova është radhitur si pjesërisht e lirë, edhe për vitin 2015. /tesheshi.com/
