Nga Blendi Gashi
Përveç mungesës së kuorumit që është bërë diç e zakonshme në Kuvendin e Kosovës një problem tjetër në legjislaturën aktuale mbetet vendimmarrja.
Ndonëse koalicioni qeverisës i ka numrat, pra 2/3, sërish po përballet me mungesën e votave për marrjen e vendimeve për disa çështje të proklamuara si prioritete politike në nivel vendi, siç është Marrëveshja për Demarkacionin e kufirit me Malin e Zi, që ndërlidhet me liberalizimin e vizave, formimi i Asociacionit të Komunave me shumicë serbe apo siç njihet ndryshe “Zajednica”, si edhe me formimin e Forcave të Armatosura të Kosovës, por që kjo e fundit kërkon një konsensus më të gjerë dhe përfshirje të përfaqësuesve serb në vendimmarrje.
Dhe pikërisht fati i koalicionit qeverisës varet nga jetësimi apo jo i këtyre temave, ku në rast dështimi shihet pashmangshëm shkuarja në zgjedhje të reja parlamentare me synim që të vijë një legjislaturë më e përgjegjshme.
“Kuvendi ka dështuar të përmbush agjendën e vet”
Ish-deputetë dhe analistë shprehin pakënaqësinë e tyre me punën e treguar gjatë tre viteve nga legjislatura aktuale, duke thënë se ka dështuar në tërësi të punoj në të mirë të qytetarëve dhe të çojë përpara temat e mëdha.
Ish-deputeti Riza Smaka, thekson se sipas rezultateve të analizave kritike për të, është më e dobëta, veçanërisht, në pikëpamjen e miratimit të akteve ligjore të përgatitura dobët nga qeveria, në mbikëqyrjen e zbatimit të ligjit të aplikuar si dhe në ushtrimin e funksionit legjislativ të diktuar nga ekzekutivi por jo edhe nga e kundërta.
Sipas tij legjislatuara aktuale as për së afërmi nuk e ka përmbushë agjenden e vet të përcaktuar dhe të proklamuar me pompozitet.
“Aktet ligjore të miratuara në numër të paktë, kanë dobësi terminologjike, teknike e mbi të gjitha onomoteknike. Projektligjet do të duhej që qeveria t’i përgatiste me përgjegjësi të lartë por Kuvendi në vend që t’ia kthente ato sponsoruesit, kryesisht qeverisë, i ka vënë në procedurë legjislative dhe për shkak të jo pak deputetëve inmeritorë dhe të paangazhuar të njëjtat i ka miratuar. Mëpastaj në praktikë, jo rrallë herë ka has sharra në gozhdë pasi dispozita ligjore të caktuara, për shkak të formulimeve të paqarta madje edhe kundërthënëse, kanë krijuar dhe krijojne probleme gjate aplikimeve në praktikë”, thotë Smakaj për tesheshi. com.
“Shumë dështime të institucionit ligjvënës”
Fatmir Sheholli, analist politik, konsideron se legjislaturën aktuale e kanë përcjell shumë sfida, ku veçon ngërçin politik të qershorit të vitit 2014.
Sipas tij legjislatura edhe pse ka numra të mjaftueshëm pra 2/3 për të marrë vendime të mëdha, sërish nuk ka pasur sukses në përballimin dhe menaxhimin e sfidave që i ka pasur para.
“Besoj që kuvendi edhe pse i menaxhuar me sukses nga ana e kryetarit Kadri Veseli, megjithatë nuk ka arritur të kryej ashtu siç është dashur mision e tij. Dështimi më i madh i kësaj legjislature është mosmenaxhimi i votave të vet mazhorancës qeverisëse”, thotë Sheholli për tesheshi. com.
Ndërsa, Islam Krasniqi, njohës i rrethanave politike shprehet se institucioni ligjvënës ketë mandat nuk ka dhënë asnjë rezultat për të mirën e qytetarëve, përveç rregullimit të mirëqenies së deputetëve dhe familjarëve apo rrjetës së tyre.
Krasniqi konsideron se kjo legjislaturë është më e dobëta që nga paslufta, pasi sipas tij po o përfundon mandati pa bërë asgjë që do mbahej mend.
“Dështimet e tyre mund të renditen një pas një, por si dështim kryesor është mungesa e ratifikimit të Demarkacionit, marrëveshje e cila po lidhet edhe me fatin e lëvizjes së lirë në zonën Shengen, ku edhe këtë mandat i lanë qytetarët të izoluar. Si dështim mund ta marrim edhe boikotimet e kuvendit me mujë të tërë të partive politike, por që të cilat në asnjë mënyrë nuk heqen dorë nga pagat e tyre të majme. ‘Suksesi’ i vetëm i kësaj legjislature është rritja e pagavë të cilat i kishin rreth 1200 në 2000 dhe mëditjet nga 50 në 200 për kundër mungeses së rezultatëve të tyre. Të gjitha këto ndryshime vijnë si pasojë e mosvetëdijësimit të popullit, dhe nëse nuk ndryshohet qasja ndaj politikës, dështimet nuk do të mungoinë as në të ardhmen”, thotë Krasniqi për tesheshi. com.
Kujtojmë se këtë mandate përveç deputetëve të partive opozitare që bojkotuan punën e kuvendit, një gjë të tillë për afër gjysmë viti e bëri edhe partia nga minoriteti serb, Lista Serbe e cila është në bashkëqeverisje me PDK-LDK-në. /tesheshi.com/
