Ka qenë jo vetëm mister por një triller, një enigmë e pakodueshme zhdukja pa gjurmë e Klemend Balilit, fundjavën e shkuar, sikur ai të ishte një jashtëtokësor.
Largimi dhe “avullimi” në eter ndërkohë që ruhej nga policia, telefonat e tij mbaheshin nën përgjim dhe më e forta, një skuadër e specializuar e RENEA-s ndodhej në aksin Sarandë-Delvinë, siç duket jo për ta kapur por si esportë.
Pas një presioni të fuqishëm nga disa palë, në radhë të parë nga Partia Demokratike, mediat, por edhe nga qarqe të LSI-së për të nxjerrë sadopak info mbi atë që ka ndodhur për të ashtuquajturin “Escobar” të Ballkanit, Ministria e Brendshme dhe policia shqiptare nuk dha asnjë koment, megjithëse nëse do ta kishte bërë do të sqaronte pozicionin dhe do të dilte dorëjashtë.
Por nuk e bëri. Madje numri një i Policisë së Shtetit, Haki Çako, tha para gazetarëve “Nuk e kam tagrin të flas”.
Po kush e ka përpos kryepolicit shqiptar tagrin të komentojë një operacion të policisë për kapjen e nje njeriu të dyshuar për trafik ndërkombëtar droge?!
Nëse lexohet me shumë kujdes deklarata e Drejtorit të Përgjithshëm të Policisë Haki Çako, se “nuk e kam tagrin të flas”, ka vetëm dy versione: ose ka një operacion jashtë juridiksionit të bluve shqiptare, ose ka një urdhër shumë të lartë për të mos folur.
Por fakt është që policia e ka ruajtur dhe vëzhguar në mënyrë të përforcuar Klement Balilin.
Prej një muaji forca të shtuara policore. madje edhe dy skuadra të RENEA-s kanë qenë prezent në kreqëzimin e Shijanit në aksin Sarandë – Delvinë, distancë shumë e afërt nga banesa e Balilit.
Ato nuk ishin parë aty që prej dy vitesh kur ndodhi aksioni antidrogë në Lazarat, por dhe më parë, kur mali i Sopotit ishte rrugëkalim droge nga Lazarati në Delvinë e më pas në Sarandë. Këto forca janë shfaqur aty që para një muaji, pra kur emri i Klement Balilit as që përflitej.
Një burim i tesheshi.com bëri të ditur se në këtë operacion ka pasur qasje direkte Departamenti Antidrogë i Shteteve të Bashkuara, DEA, i cili mësohet se ka kryer operacion vëzhgimi, infiltrimi dhe më pas neutralizimi të faktorëve që përfshiheshin në operacionin e madh antidrogë në Delvinë dhe Sarandë.
Para dy muajsh, një agjent i DEA-s ka rënë në kontakt me Klement Balilin, dhe burime të rëndësishme policore theksojnë se kontakti prej asaj kohe ka qenë direkt dhe policia shqiptare ka pasur vetëm rol rikonjicioni dhe mbrojtës.
Pas shpërthimit të skandalit të famshëm, Klement Balili foli vetëm njëherë, duke thënë se “e ka të pastër dëshminë e penalitetit” dhe se PD-në që po e akuzonte, mund ta çonte në gjygj.
Pas asaj deklarate pati vetëm mister, që e kanë shtuar si veprimet e Policisë, e cila ka bërë të ditur se “di shumë” por ka folur pak, si të partisë që e propozoi, e cila ka qenë e “kapur gafil” dhe nuk ka pasur informacion.
Drejtues të lartë të LSI-së kanë tentuar të lidhen me Balilin por nuk kanë mundur.
Nga ana tjetër, deklarata e djeshme e Saimir Tahirit, ministrit të Brendshëm i ka hedhur benzinë zjarrit pasi bënte me dije se gjithçka ishte nën kontroll dhe nuk e quante skandal të gjithë këtë situatë.
Duke shtuar këtu edhe aferën e përgjimeve të nxjerrë nga opozita, ish-kryeministri Berisha dhe disa eksponentë të LSI-së në rrjetet sociale, ushqejnë edhe më shumë tezën e zhdukjes së “Escobarit” të Ballkanit në një “trekëndëshin e Bermudeve” që mund ta fusë atë në “frigorifer” për ta nxjerrë në një kohë “të përshtatshme”.
Përgatiti: Ylli Pata – /tesheshi.com/
