Në kazanin e lajmeve të mediave online – dhe këtu fjala kazan nuk ka ndonjë konotacion kryeministror me theks denoncues, injorues e përçmues, por ka kuptimin e drejtpërdrejtë të enës së stërmadhe plot e përplot me lajme – ishte dhe ai mbi një vizitë të ministres gjermane të Mbrojtjes në Arabinë Saudite, ku thuhej se ajo kishte refuzuar të vendoste ferexhenë, gjë që i paska tërbuar zyrtarët sauditë; e që nga ana tjetër ajo për këtë refuzim është sulmuar nga të tjera fronte.
“Ajo shkoi në Riad dhe refuzoi të vinte ferexhenë.
Megjithëse zyrtarët nuk kanë patur mundësinë të ankohen, përdoruesit në rrjet dhe mediat vendase e kanë sulmuar atë”, ishin frazat bazë të lajmit (dhe çudi se si mundet që pas këtij skandali të dy palët të qeshin), ku askund nuk sillej për ilustrim ndonjë sulm verbal. Dhe në fakt ajo nuk ka përse të sulmohet, pasi nuk ekziston asnjë rregull protokollar i qeverisë saudite që e detyron ndonjë zyrtare nga një vend tjetër që sapo të shkelë në territorin saudit duhet të vendosë ferexhenë. Mundet që ndonjë sosh ta vendosë vetë ndonjë shami në kokë, thjesht për respekt; por nuk gjasë që të detyrohet kush – në rastin konkret ndonjë qeveritare e huaj – që t’i nënshtrohet ndonjë rregulli etik me ferexhe.
Po të qe kështu, autoritetet saudite më së paku do i kishin kërkuar ministres gjermane që të mos mbajë pantollona, në variantin “burrash”, pasi dhe kjo është e papërputhshme me traditën fetare vendase. Vizita dy muaj më parë e “shoqes” shqiptare të Ursula von der Leyen, Mimi Kodheli e tregon më së miri këtë. Siç shihet në foto, edhe kreu – femër i Mbrojtjes shqiptare është pa ferexhe dhe me pantollona.
Nuk besohet që dhe Mimit, autoritetet saudite t’i kenë kërkuar të njëjtën gjë dhe ajo të ketë refuzuar t’i bindet etikës protokollare saudite. Kjo dhe për shkak të propabilitetit shumë të vogël për të ndodhur i njëjti incident me dy qeveritare të ngjashme, si në pamje ashtu dhe në veshje, po ashtu dhe me të njëjtin funksion, dhe për më tepër brenda dy muajsh. /tesheshi.com/
