Plani i qeverisë së Georgia Melonit për strehimin e emigrantëve në Shqipëri, në përpjekje për të ndalur flukset migratore në ujërat italiane, është kthyer në një fiasko. Dhe ndërsa plani parashikonte që tre mijë njerëz në muaj do të qëndronin në Shqipëri, ai nuk funksionoi kurrë, shkruan The Guardian.
Qendrat e emigrantëve u hapën në tetor, shkruan media britanike, por dy muaj më vonë, gazetarët shqiptarë të paraqitur si turistë pikasën disa nga oficerët e policisë duke qëndruar në një hotel me pesë yje me pishinë dhe spa në Shëngjin, porti shqiptar që strehon qendrën e emigrantëve.
“Kemi ardhur këtu për punë, jemi sigurimi i qendrës së emigrantëve, […] por nuk ka emigrantë në objekt, ata janë transferuar në Itali”, thane policët për gazetarët e Piranja-s “Jemi vetëm ne këtu. Ne paguhemi që të sillemi si turistë: mëngjes, darkë dhe sauna, të gjitha falas – të paguara nga qeveria italiane”, shtuan ata.
Objektet në Shëngjin janë bosh. Qendrat ishin shpallur se promovonin një model të ri të ndalimit të emigrantëve jo-BE. Megjithatë, gjyqtarët italianë e kanë shpallur të paligjshme çuarjen e emigrantëve në Shqipëri, përpara se t’i riatdhesojnë në vende si Bangladeshi dhe Egjipti, të cilat konsiderohen “të sigurta” nga Roma.
Vetëm 24 azilkërkues janë dërguar njëherë në Shqipëri dhe asnjë nuk ka mbetur atje. Prej tyre, pesë qëndruan për më pak se 12 orë, ndërsa pjesa tjetër qëndruan për pak më shumë se 48 orë.
Marrëveshja Romë-Tiranë ka një kosto rreth një miliard euro për pesë vjet, thekson Guardian.
“Qendrat do të funksionojnë”
“Qendrat për emigrantët në Shqipëri do të funksionojnë, edhe nëse më duhet të kaloj çdo natë atje nga tani deri në fund të mandatit të qeverisë italiane”, tha së fundi Meloni.
Megjithatë, zhvillimi i deritanishëm e ka dëmtuar besueshmërinë e saj, pasi emigracioni ishte një temë qendrore e fushatës zgjedhore dhe ajo vetë kishte kritikuar paraardhësit e saj për menaxhimin e krizës së emigracionit, duke thënë se ishte një humbje e parave publike.
“Pse t’i hedhim kështu paratë e italianëve? Pse t’i lëmë forcat e rendit me pushime në Shqipëri kur kemi nevojë për staf në qytetet tona?”, pyeti ish-kryeministri dhe kreu i partisë Italia Viva Matteo Renzi, duke shtuar: “Marrëveshja e migracionit me Shqipërinë është një nga farsat më të mëdha në historinë tonë (…) kushtoi një miliardë euro dhe shërben si strehë për qentë.” /tesheshi.com/
