I dërguari special amerikan për Ballkanin Perëndimor, Gabriel Escobar, tha së fundi se zgjidhja e problemit të Kosovës kërkon “përparim shumë të shpejtë” në dialogun ndërmjet Beogradit dhe Prishtinës.
“Nuk jam i vetëdijshëm se propozimi evropian kërkon një zgjidhje urgjente brenda disa javësh, por sigurisht që kërkon përparim shumë të shpejtë në dialog”, tha Escobar për Radio Televizionin Serb (RTS).
Escobar tha për “Oko magazinë” të RTS se nuk është detyrë e SHBA-ve apo e Bashkimit Evropian të vendosin afate për Serbinë dhe Kosovën dhe se dialogu duhet të zhvillohet në kontekstin e përcaktuar nga BE-ja.
Nje media në Kosovë njoftoi të enjten si “lajm ekskluziv” nga qarqet ndërkombëtare se marrëveshja e parë mes Kosovës dhe Serbisë duhet të arrihet deri më 24 shkurt 2023 me detyrime të të dyja palëve dhe nëse arrihet ka paketa financiare.
“Nuk ka kërcënime, nuk janë planifikuar sanksione. Nga këndvështrimi ynë, edhe Serbia edhe Kosova janë partnerë të rëndësishëm, konstruktiv dhe e gjithë kjo duhet të bëhet në kuadër të dialogut të udhëhequr nga Bashkimi Evropian”, tha Escobar
Escobar tha gjithashtu se nuk ka afate për formimin e Unionit të Komunave Serbe, për të cilën insiston Beogradi, duke iu referuar Marrëveshjes së Brukselit të vitit 2013, por se mbetet një obligim ekzistues që Prishtina duhet ta përmbushë.
“Unë gjithmonë e ngre këtë çështje me autoritetet e Kosovës. Është obligim ekzistues dhe i vetmi në kuadër të dialogut të Brukselit që ka kaluar në Kuvendin e Kosovës. Prandaj është vendimtare që të zgjidhet kjo çështje”, tha zyrtari amerikan.
Escobar tha se SHBA-të janë të shqetësuara se dialogu ndërmjet Serbisë dhe Kosovës nuk po përparon dhe beson se të dyja palët duhet “të angazhohen në mënyrë konstruktive në dialogun e udhëhequr nga BE-ja”, duke zbatuar marrëveshjet ekzistuese dhe duke u përkushtuar për zgjidhjen paqësore të të gjitha mosmarrëveshjeve.
“Shtetet e Bashkuara mbështesin njohjen reciproke. Ne besojmë se do të ishte më e mira për rajonin, por thelbi i dialogut është që të dyja palët të gjejnë një zgjidhje që u përshtatet atyre”, theksoi Escobar.
I pyetur nëse kjo është e mundur pa njohje reciproke, Escobar u përgjigj pozitivisht “në rast se ka një zgjidhje që i përshtatet të dyja palëve” dhe “nëse të dyja palët bien dakord”. /tesheshi.com/
