Sanksionet nuk janë mjeti kryesor i angazhimit amerikan në Ballkanin Perëndimor, por ato kanë një efekt dhe do të vazhdojnë ta bëjnë këtë, tha në një intervistë Zv.Ndihmës Sekretari i Shtetit dhe i Dërguari Special për Rajonin, Gabriel Escobar, duke shtuar se korrupsioni është një problem madhor në Ballkan.
Escobar theksoi për Zërin e Amerikës se politika dhe angazhimi amerikan në Ballkanin Perëndimor i referohen tradicionalisht pajtimit multietnik dhe integrimit në Bashkimin Evropian.
“Në këtë aspekt, politika e katër administratave të fundit ka qenë shumë konsistente. Ajo që mund të them që ka ndryshuar pak është sasia e vëmendjes që ka marrë Ballkani Perëndimor në këtë administratë. Pra, ka një përpjekje të ripërtërirë për t’u riangazhuar në të gjithë mekanizmat…”, theksoi Escobar.
Ai shtoi se “është pak zhgënjyese që, nga njëra anë, nuk ka pasur përparim të mëtejshëm në integrimin evropian, gjë që shumë vende nuk kanë bërë përparim të mëtejshëm në zbatimin e reformave”.
“Sidomos në luftën kundër korrupsionit, që do të thosha se është sfida më e madhe në Ballkanin Perëndimor. Megjithatë, më duhet të them se ne kemi partnerë shumë të mirë në rajon dhe qeveri që janë të përkushtuara për këtë program të integrimit evropian, luftën kundër korrupsionit dhe thellimin e lidhjeve me fqinjët”, tha ai. /tesheshi.com/
