Në një fjalim para ligjvënësve në parlamentin e ri të vendit, e të transmetuar në televizion, Beshar Esadi është zotuar të çlirojë çdo centimetër të territorit.
“Siç e çliruam Palmirën, kështu do të çlirojmë çdo centimetër të Sirisë.”
“Nuk kemi alternativë tjetër veç fitores,” u ka thënë ai deputetëve të dalë nga zgjedhjet e përgjithshme në prill në zonat e kontrolluara nga qeveria.
Sipas tij, situata në terren ishte shumë më e mirë se disa muaj më parë, e se po përmirësohej nga dita në ditë.
E sa për zgjedhjet, Beshar Esadi do të deklaronte: “Populli sirian e habiti botën edhe një herë me një pjesëmarrje të paparë votuesish, dhe me një numër të paprecedent kandidatësh.”
Duke prekur temën e bisedimeve të paqes nën kujdesin e OKB-së, shefi i regjimit sirian, theksoi se Siria do të qeverisej nga një “qeveri uniteti”, e jo nga një “organ qeverisës kalimtar”, siç kërkohet nga opozita.
“Nuk do të pajtohemi me asnjë çështje jashtë deklaratës së parimeve që i kemi paraqitur OKB-së. Nuk do ta pranojmë atë!”
Lufta pesëvjeçare në Siri është kthyer në favor të Esadit që prej nisjes së fushatës ajrore të Rusisë shtatorin e shkuar. Nga ajo kohë, trupat e regjimit sirian kanë përparuar në shumë pjesë të territorit të vendit që më herët kanë qenë nën kontrollin e rebelëve.
Nuk dihet ende nëse transmetimi i fjalës së Esadit ishte i drejtpërdrejtë apo i regjistruar. /tesheshi.com/
