Po botojmë dhe një pjesë të mbetur nga intervista e djeshme e ish-një ndër krerëve të Policisë së Shtetit, Erzen Breçani. Këtu ai jep opinionin e tij mbi incidentet e ditëve të fundit, ku nuk pranon që uniformat blu të keqgjykohen nga opinioni, nisur nga disa pamje. Dhe më konkretisht, nuk është dakort me masën që iu dha dy punonjësve të Policisë në Tiranë, pas një përplasjeje me një femër…..
Shprehet Breçani:
Veprimet e fundit të pasqyruara në media, nuk janë veprime të cilat unë i bashkohem opinionit. I dënoj rastet dhunës, por jo të gjitha rastet janë të njëjta dhe duhet të përfaqësojnë oponionin për punonjësit e policisë në përgjithësi. Për mendimin tim, kjo vjen nga drejtimi dhe orientimi i gabuar i drejtuesve të Policisë në terren. Pra Policia është nën presion, është nën trysni dhe nën stresin e vazhdueshëm që askush nuk do t’ia dijë për të, sidomos sot. Analizohet vetëm ajo çfarë shihet në media, jo ajo çfarë nuk shihet. Ajo që nuk shihet është stresi, orët e gjata të punës, mungesa e besimit dhe pasiguria e vendit të punës. Pra Policia e ka emrin me laps, ndryshe çfarë shohim në media. Presioni po ndodh tek mësuesit dhe mjekët, por ata janë të bashkuar dhe të solidarizuar. Sot punonjësi i Policisë nuk guxon as të ngrejë zërin për të drejtat që i shkelen çdo ditë. Referuar rastit në Tiranë, rastit të dhunës së ushtruar ndaj një femre nga një punonjës Policie në detyrë, kam informacione se pjesa e parë e pamjeve nga dora e atj që ka regjistruar, nuk është dhënë në media. Informacionet janë se ajo femra për të cilën thuhet se është dhunuar nga polici, e ka goditur më parë punonjësin e Policisë kur i ka treguar që ia ka dhënë patentën dhe ajo ndodhet te këmbët e tij. Kur punonjësi i Policisë goditet, atij i lind e drejta të reagojë ndaj dhunës së ushtruar ndaj tij. Këta punonjës Policie që kanë punuar ditë e natë, a e meritojnë një fyerje të tillë nga shteti, të përjashtohen dhe të shkojnë dhe në burg?! Sot, ne punonjësit e Policisë së Shtetit e dimë shumë mirë që jemi të braktisur. Nuk përmenden punët e mira të bëra ndër vite, përballjet me bandat dhe kriminelët, kur qeveria prej dy vitesh në pushtet thotë “fillojmë nga viti 0” që të harrohen dëshmorët që dhanë jetën për rendin dhe sigurinë publike?! Sot për mendimin tim duhet të japë dorëheqje një orë e më parë Ministri i Punëve të Brendshme, i cili në vend të drejtojë Drejtorinë e Përgjithshme të Policisë për strategjinë e punës së punonjësve të Policisë, po bën drejtimin operativ të Policisë së Shtetit. Nuk ka si të jetë ndryshe, krime më tepër, eksploziv, grabitje dhe policë të braktisur dhe të tradhëtuar, që nuk i mbron as sindikata që është inekzistente. Veç kësaj, punonjësit e Policisë kanë ikur dhe nga objekti i punës së tyre. Ata kanë muaj të tërë që punojnë në mbështetje të elektiçisteve (OSHEE), gjë që ka sjellë shpërqendrimin e tyre. Nuk është ky policimi në komunitet. Sot çdo veprim bëhet me policë. Kjo e ka larguar policinë nga objektivi i saj, nga krimi. Në mënyrë paradoksale kur ngjarjet ndodhin, kërkohen dhe informacione, por informacionet nuk merren duke shoqëruar elektiçistët. Kjo është braktisje.
Intervistoi: Arseola Mulia
