Përfundimisht dhe zyrtarisht ish-deputetja e BDI-së deri më sot, Ermira Mehmeti ka njoftuar dorëheqjen e saj nga partia shqiptare në pushtet në Maqedoni, BDI. Me konstituimin e Kuvendit, asaj sot i ka përfunduar mandati si deputete në Kuvendin e Maqedonisë. Andaj, ajo ka zgjedhur facebook-un që ta informojë opinionin e gjërë lidhur me vendimin e saj. Pas këtij vendimi të rëndësishëm, Mehmeti shkruan se do të tërheq të gjitha simbolet dhe ikonografitë politike nga faqja e saj zyrtare, për të vazhduar jetën si qytetare e lirë që nuk përfaqëson asnjë subjekt politik në Maqedoni.
Ja statusi i saj i plotë në facebook:
“Të nderuar votuese dhe votues,
Të nderuar mbështetës,
Të nderuara zonja dhe zotërinj,
Dëshiroj t’ju informoj se sot përfundon mandati im si deputete në Parlamentin e Maqedonisë. Gjatë tetë viteve të kaluara kam qenë e nderuar dhe e obliguar që t’ju shërbej juve dhe të punoj për zgjidhjen e problemeve dhe realizimin e kërkesave tuaja. Sot përfundon ky rrugëtim përplot sfida dhe përgjegjësi për mua.
Dëshiroj të informoj opinionin poashtu se duke filluar nga sot, publikisht dorëhiqem nga të gjitha funksionet e mia politike në Bashkimin Demokratik për Integrim.
Që sot, unë, Ermira Mehmeti, jam qytetare e lirë dhe nuk përfaqësoj asnjë subjekt politik. Të gjitha simbolet dhe ikonografia politike, duke filluar nga sot dhe në ditët në vijim, do të hiqen nga faqja ime zyrtare dhe nga faqja e fansave në facebook.
Në fund, më lejoni që t’ju dëshiroj gëzuar Vitin e Ri 2017, dhe t’ju uroj që të gjithëve pa dallim, shëndet, mbarësi dhe mirëqenie!
Me shumë respekt,
Ermira Mehmeti”, ka shkruar Ermira Mehmeti.
Ermira Mehmeti për momentin është angazhuar si këshilltare nga Parlamenti austriak. Më saktë, bëhet fjalë për një kontratë 1-vjeçare si këshilltare politike dhe juridike e deputetit austriak, Stefan Schennach në Këshillin e Evropës.
Distancimi i Ermira Mehmetit nga fushata parazgjedhore e BDI-së dhe mungesa e saj në listat e kandidatëve për deputetë si duket i ka kushtuar shumë shtrenjtë këtij subjekti politik, pasi që në krye me Ermirën si bartëse e listës së BDI-së në njësinë zgjedhore numër 1, kjo parti fitoi dyfish më tepër vota se sa tani me Artan Grubin si bartës liste.
Mirëpo ajo që e shëmtoi imazhin e deputetes në fjalë, ishte publikimi i një audio-skandalit në rrjetet sociale ku dëgjoheshin bisedat me tema erotike ndërmjet saj dhe ish zv/kryeministrit për Implementimin e Marrëveshjes së Ohrit, Musa Xhaferi, për të cilat, Ermira Mehmeti i ka quajtur të montuara dhe tendencioze.
Nga ky moment e më tutje, ccdo ditë e më shumë janë zbehur paraqitjet e saja në publik, përfshirë këtu edhe mungesën e saj në karriget e Kuvendit. /tesheshi.com/
