Mensur Krasniqi
Si çdo fundviti, edhe dje kryetari i shtetit të Maqedonisë, Gjorgje Ivanov, tradicionalisht mbajti fjalim pranë deputetëve në Kuvend.
Nuk është aq e rëndësishme përmbajtja e fjalimit të Ivanov, meqë është vetëm një fjalim përshëndetës për fundvit, mirëpo ajo që ra në sy ishte mosprezenca e asnjë nga deputetët e partisë opozitare maqedonase LSDM-së dhe partisë shqiptare në pushtet BDI.
Me këtë, mund të konstatohet se edhe më tutje Ivanov mbetet kryetar jolegjitim për LSDM-në dhe BDI-në. Për arsyet e bojkotit të Ivanovit nga BDI-ja, në emisionin “10 Minuta”, në TV21, foli deputetja e kësaj partie, Ermira Mehmeti. Kjo sipas saj u bë për shkak se Ivanov nuk reflekton vullnetin e përgjithshëm të shoqërisë, pasi që ai në atë post nuk ka ardhur si rezultat i një konsensusi etnik në mes partive më të mëdha politike. Mospërfshirja e kuadrove shqiptarë në kabinetin e tij, sipas deputetes, tregon për qasjen refuzuese që ai ka ndaj idesë së një Maqedonie shumetnike.
“Ne e konsiderojmë atë si përfaqësues jolegjitim dhe për këto arsye kemi vlerësuar se nuk do të jemi prezent në ekspozetë vjetore të tij”, u shpreh Ermira Mehmeti.
Ndërkaq, pas marrjes se “ok” nga qeveria, për universitetin e ri në tre gjuhë(shqip, maqedonisht dhe anglisht), e pyetur nëse kjo është një tregues për vazhdimin e koalicionit me BDI dhe VMRO, pas zgjedhjeve të 24 prillit, Mehmeti nënvizon se kjo do të vendoset vetëm nga votat e qytetarëve. Ajo tha se përgatitjet për ngritjen e Universitetin “ Nënë Tereza”, pritet të bëhen me procedurë të shpejtuar, gjatë javës së ardhshme, në mënyrë që të krijohen kornizat ligjore.
Ndërkohë, duke folur për ngecjen e bisedimeve të grupeve punuese, ajo tha se ka qenë e pritshme që kjo të mos jetë një rrugë e lehtë.
“Gjithë procesi i Përzhinos bazohet në konkluzionet dhe rekomandimet e raportit të Pribes dhe unë këtë raport e shoh si kornizë për një Maqedoni më të mirë, për një Maqedoni ndryshe”, shtoi Deputetja Mehmeti.
Ligjvënësja tha se për sa kohë Bashkimi Europian flet për zgjedhjet e 24 prillit, kjo do të thotë se ato zgjedhje do të mbahen. Për një koalicion të mundshëm me paritë e tjera shqiptare, Mehmeti u shpreh se BDI-ja gjithmonë ka pasur qasje konstruktive dhe jo refuzuese, por se si të gjithë, në zgjedhjet e ardhshme do të përpiqet ta bëjë e vetme këtë betejë.
Ndërsa për qëndrimin e BDI-së në lidhje me këmbënguljet e qytetarëve të Tetovës për mbylljen e “Jugohromit”, Ermira Mehmeti bëri të ditur se BDI-ja do të kërkojë mbylljen, nëse nuk vendosen filtrat. /tesheshi.com/
