Një ditë pasi ish-deputetja në rradhët e partisë shqiptare në pushtet të Maqedonisë, BDI-së, Ermira Mehmeti në emisionin 360 shkallë të TV Alsat, kishte deklaruar se BDI ndonëse ka fituar 10 mandate, megjithatë është humbëse morale e këtyre zgjedhjeve, kësaj deklarate ia pa sherin vetura e saj.
Ajo në rrjetin social facebook ka bërë të ditur se si pasojë e deklaratave të saja kundër BDI-së një ditë më parë, përveç thyerjes së xhamave të veturës ka pranuar edhe mesazhe kërcënuese, thirrje anonime pas mesnate dhe skenare të ndryshme që dëmtojnë rëndë imazhin e saj.
“Kërcënim, frikësim, shantazh, apo mesazh që ta mbyll gojën?
Ju mund të vazhdoni të theni edhe xhamat tjera të makinës time, mund të më dërgoni pa ndalur mesazhe kërcënuese, mund të vazhdoni me thirrjet anonime pas mesnate, mund të vazhdoni të bëni skenare kundër meje.. kjo nuk e ndryshon realitetin politik – se ju jeni asgjë më shumë pos humbës tragjikë!
Paçit ditë të mbarë,
Familja Mehmeti!”, kështu ka shkruar Ermira Mehmeti në profilin e saj në facebook. /tesheshi.com/
