Pasi tentuan t’i marin erzin duke i publikuar një bisedë me nota erotike me ish-bashkëpartiakun e saj, zv/kryeministrin për implementimin e Marrëveshjes së Ohrit në Maqedoni, Musa Xhaferin, ish-deputetja e BDI-së, Ermira Mehmeti sërish është angazhuar në politikë. Mirëpo kësaj rradhe ajo nuk është pjesë e kuadrove të BDI-së, por në nivel ndërkombëtar, gjegjësisht si këshilltare nga Parlamenti austriak. Më saktë bëhet fjalë për një kontratë 1-vjeçare si këshilltare politike dhe juridike e deputetit austriak, Stefan Schennach në Këshillin e Evropës.
“Kontrata parashikon angazhimin tim si këshilltar politik dhe juridik i deputetit Stefan Schennach, në fushat e marrëdhënieve ndërkombëtare, hartimit të strategjive për Ballkanin, zhvillimin e qëndrueshëm, energjisë së rinovueshme. Në mënyrë më specifike, kontrata parasheh angazhim, këshillim dhe asistencë në hartimin e raporteve dhe Rezolutave të Këshillit të Evropës në Komitetin e Monitorimit, konfliktit ndërmjet vendeve anëtare, Komitetin për kulturë dhe Komitetin mbi Rregulloren e Asamblesë Parlamentare”, ka deklaruar për Gazetën Lajm, Ermira Mehmeti.
Rikujtojmë se në zgjedhjet e vitit 2014, Mehmeti ishte bartëse e listës së BDI-së në njësinë zgjedhore numër 1, kur kjo parti fitoi gati dyfish më tepër vota se tani me Artan Grubin si bartës liste.
Por ajo që e largoi nga politika ishte publikimi i bisedave telefonike ndërmjet saj dhe bashkëpartiakut të saj, Musa Xhaferi, me ç‘rast Mehmeti u detyrua që një periudhë të gjatë fare të mos paraqitet në publik.
Dhe derisa Ermira Mehmeti është larguar nga strukturat e BDI-së, nga ana tjetër Musa Xhaferi vazhdon të luajë një rol të rëndësishëm në krijimin e politikave të BDI-së, kështu duke qenë krahu i djathtë i kreut të kësaj partie, Ali Ahmetit.
Krasniqi – /tesheshi.com/
