Numri dy i grupit parlamentar të PS-së, Erion Braçe ka akuzuar Presidentin e Republikës, Bujar Nishani, që ka ndikuar në pafajësinë e dhënë për ish-Guvernatorin e Bankës së Shqipërisë, Ardian Fullani.
Braçe deklaroi në Report tv, se sipas tij Fullani është përgjegjës për vjedhjen më të madhe të realizuar brenda Bankës së Shqpërisë dhe për këtë duhet të ndëshkohet.
Kryetari i Komisionit Parlamentar të Ekonomisë, theksoi se ftesa e Fullanit në një ballo të organizuar nga familja presidenciale është shenjë që i është dhënë organeve të drejtësisë.
“Mund të ndodhi gjithçka në këtë vend me ketë sistem drejtësie që kemi. Kur i pari i drejtësisë, presidenti i Republikës, bën ballo dhe fton në ballo në cilësinë e të ftuarit të nderit, një person që sapo kishte dalë nga biruca dhe që natyrisht ishte nën hetim.
Më thoni mua se ç’ndikim ka kjo kur i pari i qeverisë në KLD, presidenti i Republikës është nën shoqëri familje të një njeriu që është nën hetim dhe çohet për gjykim. Dhe çfarë efekti ka kjo tek prokurorët dhe çfarë efekti ka tek gjykatësit”, tha Braçe. /tesheshi.com/
