Kontigjenti prej 20 eritreas që Tirana vendosi të marrë nga Italia, duke ndërhyrë mes stil filantrop në një krizë mes Italisë dhe BE-së, nuk do mund të vijë në Shqipëri, vetëm në rast se ata vetë shprehin dëshirë për të kaluar këndej Adriatikut. Kjo pasi Bashkimi Europian nuk e parasheh një akt të tillë në ligjet e brendshme të unionit.
“Për të dërguar emigrantët në Shqipëri, siç parashihet me marrëveshjen e arritur midis qeverisë së Romës dhe asaj të Tiranës, në rastin e personave të mbetur në anijen ‘Diciotti’, Italia duhet të marrë pëlqimin e vetë personave më përpara”, tha zëdhënësja e BE-së, Natasha Bertaud, cituar nga TCH.
“Dërgimi i azilkërkuesit në një vend të tretë, pa e vlerësuar kërkesën për azil, përbën refuzim dhe nuk lejohet as nga BE dhe as nga e drejta ndërkombëtare”, shtoi ajo.
E vetmja mënyrë që 20 emigrantët të dërgohen nga Italia në Tiranë, është që ata vetë të shfaqin vullnetin e tyre të lirë për të shkuar në Shqipëri.
Në gjykimin e Brukselit, komenton TCH, një vend i unionit nuk mund t’i dërgojë emigrantët në një vend të tretë, pa shqyrtuar më parë kërkesën e tyre për azil. Aq më tepër, për t’i dërguar në Shqipëri, një vend që nuk është as vendi i origjinës, as destinacioni i tyre final dhe as vend tranzit në rrugën e tyre drejt BE-së.
Kështu, kjo përbën një “buzëqeshje të ngrirë” për qeverinë e Tirëns, e cila për një moment e pa veten të faktorizuar në debatin e madh europian mbi krizën e emigrantëve, me një gjest që u përshëndet vetëm nga Salvini. /tesheshi.com/
