Presidenti turk Rexhep Tajip Erdogan tha se Turqia do të vazhdojë me masat aktuale kufitare derisa të përmbushen të gjitha pritshmëritë e saj, përfshirë hapjen e një kapitulli për lëvizjen e lirë, një rishikim të bashkimit doganor dhe ndihmën financiare nga Bashkimi Evropian.
Erdogan foli në një takim të rregullt me deputetë të Partisë Drejtësi dhe Zhvillim (AK Parti) në Ankara, duke iu referuar ngjarjeve aktuale.
Fokusi i fljalmit të Erdoganit ishte kriza e refugjatëve dhe situata në Idlib.
Ai tha se Turqia kishte rënë dakord për armëpushim të përkohshëm dhe marrëveshje të tjera në Siri, pasi kërkonte një zgjidhje të qëndrueshme të krizës Idlib.
“Ne kemi rënë dakord për një armëpushim të përkohshëm dhe marrëveshje të tjera për të gjetur, nga të gjitha anët, një zgjidhje të arsyeshme, të mundshme dhe të zbatueshme për krizën e Idlib, jo sepse ne nuk kemi forcën për të luftuar regjimin dhe organizatat terroriste,” tha Erdogan.
“Ne do t’i përmbahemi premtimeve që kemi bërë, për sa kohë që regjimi dhe militantët që e mbështesin atë tregojnë të njëjtën ndjeshmëri. Nëse ata nuk zbatojnë premtimet e tyre, ne nuk do të përmbahemi nga përgjigjja jonë, edhe më të ashpër sesa ishte herën e fundit”.
Ai kritikoi Greqinë për trajtimin e refugjatëve në kufirin midis dy vendeve, duke thënë se një trajtim i tillë çnjerëzor ishte barbari.
“Njerëzit e pafajshëm, të cilët nuk kanë qëllim tjetër veçse të shpëtojnë jetën e tyre dhe t’u sigurojnë fëmijëve një të ardhme më të mirë, ekspozohen ndaj veprimeve çnjerëzore siç janë hapja e zjarrit, hedhja e gazit lotësjellës dhe derdhja e ujit të nxehtë. Kjo është një barbari në kuptimin e vërtetë të fjalës”, tha Erdogan, duke theksuar se “midis asaj që bënin nazistët dhe asaj që ne shohim sot në kufirin grek, nuk ka asnjë ndryshim”. /tesheshi.com/
