Shtetet e Bashkuara të Amerikës dhe Turqia, dy aleatë strategjikë të NATO-s, kanë patur prej kohësh fërkime për situatën në rajon, ashtu si dhe për atë në Turqi.
Mbështetja amerikane për YPG/PYD-në në Siri, të konsideruara nga Turqia si degët siriane të PKK-së e si kërcënim për kufijtë e saj, dhe çështja e kreut të FETÖ-s, organizatës përgjegjëse për grushtin e dështuar të shtetit të 15 korrikut, kanë sjellë mjegullimin e marrëdhënieve mes dy aleatëve.
Të pakënaqur hapur me administratën e Barack Obama-s, autoritetet turke shpresojnë fort në një kthesë të marrëdhënieve me hyrjen e Donald Trump-it në Shtëpinë e Bardhë.
Një hap i parë është hedhur me vizitën e djeshme të presidentit Erdoğan në Uashington, të pritur përzemërsisht nga Trump, e me ftesën që miku turk i bëri mikpritësit për një vizitë në Ankara.
Takimi mes tyre kokë më kokë duket të ketë qenë i frytshëm, pasi Trump është parë posaçërisht i qeshur në konferencën e shtypit menjëherë më pas. Erdoğan-i, nga ana tjetër, ka përcjellë shpresën për një kthesë historike në këto marrëdhënie.
Po kaq i frytshëm besohet të ketë qenë dhe takimi dypalësh, ku të pranishëm ka patur dhe anëtarë të kabineteve përkatëse, e që ka zgjatur dy orë.
Të tërë këtë e dëshmon një mesazh në Twitter i presidentit amerikan, ku thuhet: “Ishte një nder i madh të prisja sot në Shtëpinë e Bardhë presidentin e Turqisë, Recep Tayyip Erdoğan.”
Në të njëjtën frymë ka qenë dhe përgjigja e homologut turk në të njëjtin rrjet social.
“Faleminderit për mikpritjen tuaj, z. President. Besoj se takimi i sotëm ka për ta forcuar partneritetin strategjik dhe aleancën tonë të gjatë.”
Sa për çështjet në diskutim, Trump deklaroi në konferencën e shtypit se e mbështet Turqinë në luftën kundër ISIS-it dhe PKK-së. Ndërsa në fjalën e tij, Erdoğani do të nënvizonte se çdo bashkëpunim me degët e PKK-së në Siri do të ishte i papranueshëm.
“Eshtë absolutisht e papranueshme që YPG/PYD-ja të merren në konsideratë si partnerë në rajon, dhe kjo është kundër një marrëveshjeje globale që kemi arritur. Ne jemi të angazhuar t’i luftojmë të gjithë llojet e terrorizmit, pa dallim, që përbëjnë një kërcënim të qartë për të ardhmen tonë,” ishte deklarimi i tij.
“Nuk ka vend për organizatat terroriste në të ardhmen e rajonit tonë,” theksoi presidenti turk para gazetarëve të shumtë.
Erdoğan-i u mjaftua me një fjali në konferencën e shtypit mbi çështjen e ekstradimit të Gülen-it: “Jam duke i shprehur hapur pritshmëritë tona në lidhje me FETÖ-n, për të cilën i kemi informuar miqtë tanë mbi përfshirjen në grushtin e dështuar të shtetit të 15 korrikut.” /tesheshi.com/
