Në një vizitë dyditore në Turqi, princi saudit i kurorës, Muhammed bin Najif, është pritur nga presidenti turk, Rexhep Tajjip Erdogan.
Mysafiri saudit është dekoruar nga mikpritësi me “Medaljen e Republikës së Turqisë”, për kontributin në zhvillimin e marrëdhënieve miqësore midis dy vendeve.
Në ceremoninë zyrtare në kompleksin presidencial në kryeqytetin turk, Erdogani e ka falënderuar posaçërisht Arabinë Saudite për solidaritetin e treguar pas puçit të 15 korrikut.
“Dua t’u falënderoj edhe një herë për solidaritetin e treguar ndaj vendit dhe popullit tonë pas përpjekjes së përgjakshme për grusht shteti të 15 korrikut,” është shprehur ai.
Përndryshe, princi i kurorës, që njëkohësisht është dhe zëvendëskryeministër e ministër i Brendshëm në qeverinë saudite, theksoi se dy vendet ndanin të njëjtin mendim mbi të gjitha çështjet rajonale e më tej.
Në bisedimet pati një zotim të përbashkët për çuarjen më tej të bashkëpunimit, në kërkim të zgjidhjeve për konfliktet rajonale që e kanë trazuar Lindjen e Mesme. /tesheshi.com/
