Presidenti turk ishte dje në jug të Turqisë, në Gaziantep, aty ku një javë më parë humbën jetën dhjetëra njerëz nga një sulm kamikaz.
Në një fjalim të mbajtur para mijëra banorëve të Gaziantepit, Erdogani shprehu vendosmërinë për t’i vijuar operacionet ndaj ISIS-it, ndaj militantëve kurdë e ndaj çdo organizate tjetër terroriste.
“Nuk mund të tolerojmë asnjë organizatë terroriste brenda apo pranë kufijve tanë. Kjo është arsyeja pse jemi në Xherablus. Nëse është e nevojshme, nuk do të ngurrojmë të marrim përgjegjësi në rajone të tjera.”
Erdogani e konfirmoi faktin se kamikazi i masakrës së 20 gushtit në Gaziantep, ku humbën jetën 54 persona, 34 prej të cilëve ishin fëmijë, kishte qenë një 14-vjeçar.
Ai ka folur për operacionin në Xherablus, duke u premtuar mbështetje banorëve të tij që gjenden në Gaziantep e që duan të kthehen. “Vëllezërve nga Xherablusi në Gaziantep, kujtdo që kërkon të kthehet në Xherablus, do t’u japim çdo lloj mbështetjeje, çdo lloj ndihme.”
“Durim, durim, durim. Tani mbaroi! Tashmë çdokush duhet ta dijë vendin e tij. Ushtrisë së Lirë Siriane i dhamë çdo mbështetje, dhe ajo bëri operacionin e duhur,” ka thënë Erdogani.
“Kemi për të dhënë çdo lloj kontributi për ta larguar DAESH-in nga Siria. Sa për çështjen e grupit terrorist të PYD-së në Siri, kemi të njëjtën vendosmëri.”
“Turqia nuk i është dorëzuar, e nuk do t’i dorëzohet, asnjë organizate terroriste,” ka qenë nënvizimi i shtetarit më të lartë turk. /tesheshi.com/
