Përpara nisjes për në Kinë, ku do të marrë pjesë në punimet e G20-tës, presidenti turk ka folur për gazetarët.
Duke iu referuar ISIS-it dhe YPG-së, Erdogani e ka bërë të qartë se vendi i tij nuk do të pranojë një “korridor terrori” në kufirin jugor.
“Askush të mos presë nga ne të pajtohemi me një korridor terrori në kufirin tonë jugor,” ka thënë ai.
“Kurrë nuk kam për të lejuar një korridor terrori në jugun tonë dhe në veriun e Sirisë; dua që çdokush ta dijë këtë.”
Forcat ushtarake turke nisën më 24 gusht operacionin “Mburoja e Eufratit”, të shtrirë në territorin sirian, e që synon eliminimin e rreziqeve që vijnë nga ajo hapësirë për Turqinë. Në objektiv kanë qenë forcat e ISIS-it, por në të njëjtën kohë janë goditur dhe militantët e YPG-së dhe PYD-së që nuk kanë pranuar të zhvendosen në lindje.
“Nuk mund të hiqemi sikur nuk i kemi dëgjuar sulmet e vazhdueshme me raketa mbi qytetet tona nga Xherablusi,” u është shprehur Erdogani gazetarëve.
Çështjet e sigurisë dhe të terrorizmit do të jenë mes temave kryesore të takimit të G20-tës, ku Erdogani do të zhvillojë bisedime me homologët e tij amerikanë e rusë, si dhe me udhëheqës të tjerë perëndimorë. /tesheshi.com/
