“Partinë për Drejtësi dhe Zhvillim, dashurinë e pasionin tim, së pari ia lë amanet Allahut, e pastaj ju. Me shpresën se do të shihemi përsëri, do të bashkohemi përsëri.”
Rexhep Tajjip Erdogani i thoshte këto fjalë në gushtin e 2014-s, në kongresin e jashtëzakonshëm të partisë që e qeveris Turqinë prej vitit 2002. Ai largohej prej saj si një detyrim kushtetues, i sapozgjedhur president i vendit.
“Nuk është një lamtumirë, por një fillim i ri,” premtonte asokohe Erdogani.
Pas 33 muajsh, më saktë, pas 979 ditësh, ai është kthyer në atë parti, që nga dje si anëtar i saj, e pas tre javësh dhe si kryetar.
Presidenti i Turqisë u rikthye dje zyrtarisht në radhët e partisë së cilën vetë e krijoi i mundësuar nga ndryshimet e reja kushtetuese, të miratuara me referendumin e 16 prillit.
Paketa e amendamenteve kushtetuese e ka patur ndër pikat e saj lejimin e kryetarit të shtetit që të mbajë lidhje me organizmin politik nga ai vjen.
“Po kthehem sot në partinë time, në shtëpinë time, në dashurinë e në pasionin tim,” u tha Erdogani dje anëtarëve të AKP-së në selinë qendrore të saj, në fjalën me rastin e rikthimit si anëtar.
“Ndarja nga partia ishte vetëm një teknikalitet zyrtar. Largësia midis nesh ishte për shkak të legjislacionit, por zemrat tona ishin gjithmonë bashkë.”
Erdogani pritet ta marrë drejtimin e AKP-së në një kongres të jashtëzakonshëm më 21 maj; një lëvizje që do t’i japë një shtysë të re partisë që e drejton vendin prej 15 vitesh. Janë paralajmëruar ndryshime në kabinetin qeverisës, ashtu si dhe në organet drejtuese të AKP-së.
Partia për Drejtësi dhe Zhvillim do të drejtohej nga Ahmet Davutogllu dhe më pas nga Binali Jëlldërëm prej 2014-s e këtej. /tesheshi.com/
