Presidenti turk, Rexhep Tajjip Erdogan, e ka kritikuar gjatë ditës së sotme vendimin e dhënë nga Gjykata Kushtetuese e vendit të tij për t’i liruar dy gazetarët e burgosur me akuzën për spiunazh. Çështja e Xhan Dyndarit (Can Dündar) dhe Erdem Gylit (Erdem Gül) nuk ka të bëjë aspak me lirinë e fjalës, sipas Erdoganit, por është e lidhur me spiunazhin.
“Duhet të përsëris se ky rast nuk është i lidhur me lirinë e shprehjes,” deklaroi presidenti turk. “Ky është një rast spiunazhi.”
Dy gazetarët e gazetës Cumhuriyet, një organ shtypi i majtë dhe me një propagandë të vijueshme e fund e krye kundër presidentit turk, u liruan të premten, pasi Gjykata Kushtetuese dha verdiktin se të drejtat e tyre qenë cenuar. Ata do të arrestoheshin në nëntorin e vitit të shkuar, të akuzuar për spiunazh, për përpjekje për rrëzimin e qeverisë dhe për mbështetje të terrorizmit.
“Nuk jam në pozitën për t’u pajtuar me këtë vendim. Por e them fare qartë: nuk pajtohem me vendimin dhe nuk kam respekt për të,” tha Erdogani në një dalje para gazetarëve. “Sipas meje, media nuk duhet të ketë liri të pakufizuar. Nuk ka liri absolute askund dhe në median botërore.”
Zyrtarë të presidencës kanë lajmëruar në të njëjtën kohë se po e ndjekin me vëmendje procesin ligjor ndaj dy gazetarëve, pavarësisht lirimit të tyre. /tesheshi.com/
